Tơ̆ jơ hop akom, rim kơdră tang măt hơlen hơdăh lơ̆m 2 khei blŭng sơnăm 2026, Điện Biên iŏk đei jơnei hơ iă, lơ tơdrong jang đei tơplih hơ iă, pơjing hơyak kăl ăn trong tŏk mŭk drăm lơ̆m sơnăm. Pơma pơtôch jơ bơ̆ jang, Thủ tướng athei dêh char tơlĕch jang kiơ̆ mă kơtang rim trong tơlĕch ăn, hơdrin jang iŏk đei tơdrong tŏk mŭk drăm đơ̆ng 11% năm tơ̆ lơ lơ̆m sơnăm 2026. Lơ̆m ou, tơring kăl akŏm jang kiơ̆ jơnei rim hnam kmăi đak tơlĕch ŭnh hơyuh, pơtrŭt kơtang atŏk tơ iung hơnih jang kmăi kmŏk pơm tơlĕch tơmam drăm, ŭnh hơyuh; adoi atŏk kơtang hơmet ming choh jang sa kiơ̆ trong choh jang sa pơm tơlĕch tơmam drăm, tơ iung pơjing trong jang tơgum djru kon pơlei choh jang sa tơplih ‘long pơtăm, atŏk kơtang lang să pơtăm ‘long theng thôih Yuăn, chehphe păng rim tơmam drăm kăl.

Gơmăng ‘năr ou mơ̆n, vang Pơm lêh Pơkao Ban hăm hơnăn “Pơkao Ban - Jơhngơ̆m đon hơpơi ‘meh vă Điện Biên”, Thủ tướng pơma tơbăt jơhngơ̆m hơmŏ tơring hơnơ̆ng iung jang kiơ̆ ‘lơ̆ng jơhngơ̆m đon tơgoăt tơgoăl kơjăp, vei kơjăp păng lang să tơdrong oei sa ‘lơ̆ng rŏ sơ̆ ki, pơm ăn dôm tơdrong đei cham char jing jơhngơ̆m pran atŏk tơ iung kơjăp ‘lơ̆ng ăn tơring Tây Bắc.