VOV4.Bahnar - Pơ gê 16/8, Thủ tướng Phạm Minh Chính păng khul jang đơ̆ng Khul kơ dră tĕh đak truh dăr lăng păng bơ̆ jang hăm Grŭp jang kơ măy kơ mŏk - Viễn thông Khul linh (Viettel).  Viettel jĭ anih jang kơ sô̆ 1 găh kơ măy viễn thông Việt Nam păng jing Anih tĕch mơ dro tih mă 4 kơ tĕh đak, iŏk yoa đơ̆ng Grŭp jang âu hơ nơ̆ng vei kơ jăp vă jê̆ 150 rơ bâu ti 1 sơ năm; iŏk yoa adrol kơ thuê̆ hơ nơ̆ng đei vă jê̆ 40 rơ bâu ti 1 sơ năm.

Jơ bơ̆ jang đơ̆ng Thủ tươ̆ng tĕh đak hăm Grŭp jang Viettel

Tang măt ăn Kơ dră chĕp kơ̆l Đảng, tĕh đak, Khul kơ dră tĕh đak, Thủ tướng chih răk păng pôk pơ ư dôm tơ drong jang đei, dôm tơ drong jơ nei mă kăn ƀô̆, si kuan, linh, bơ ngai jang đơ̆ng Viettel hlôi adrin, jang đei lơ̆m khei ‘năr âu ki. Vă jang đei jơ nei ‘lơ̆ng tơ̆ hơ năp kơnh, Thủ tướng athei Anih tơm vei lăng khul linh tĕh đak pơ tho ăn Grŭp jang Viettel bơ̆ jang mă ‘lơ̆ng 1,2 tơ drong jang tơm, lơ̆m nŏh pơ ma hơ dăh: Viettel athei jing anih jang ‘lơ̆ng rơ gei kơ anih tĕch mơ dro ăn tĕh đak, bơ̆ jang đei yoa hlŏh dơ̆ng, jĭ grŭp jang kơ măy kơ mŏk ‘nao ‘lơ̆ng kơ tĕh đak, jang rơ gei, hơ bĕch hơ bal, đei kơ sư̆k pơ jei pran lơ̆m tĕh đak păng tơ̆ tĕh đak đe.

Dơ̆ng: Tơ blơ̆