VOV4. Bahnar - Kơsơ̆ năr 22/3, tơ̆ Hơnĭh bơ̆ jang Khŭl kơdră tĕh đak, Thủ tướng Phạm Minh Chính bơ̆ jang hăm Khŭl kơdră chĕp pơgơ̆r Trung ương Khul Bơngai ‘lŏ kră Việt Nam. Tơbăt tơ̆ Hop akŏm, Kơdră chĕp pơgơ̆r Khŭl bơngai ‘lŏ kră Việt Nam Nguyễn Thanh Bình tơbăt, Khŭl bơngai ‘lŏ kră Việt Nam roi năr roi atŏk tơ iung, pran kơ jăp găh hơnĭh jang, akŏm đei lơ bơngai ‘lŏ kră vang mơ̆t lơ̆m khŭl. Trŭh dang ei, Khŭl bơngai ‘lŏ kră hlôi đei hlŏh 9 trĭu 700.000 ‘nu bơngai, tơmơ̆t 90% măt bơngai ‘lŏ kră lơ̆m tĕh đak. Iung pơma pơtôch hop akŏm, Thủ tướng Phạm Minh Chính pơtrŭh nơ̆r ƀơ̆r pơma hơpơi ‘mĕh vă rim bơngai ‘lŏ kră ling lang pran jăng grăng akau, adoi sơkơ̆t hơdăh ‘măng bơ̆ jang au tơbăt hơdăh hơnăp jang đơ̆ng Khŭl kơdră Tĕh đak hăm bơngai 'lŏ kră, xek tơlang mĭnh ƀar trong jang, tơdrong tơgŭm djru hăm bơngai ‘lŏ kră. Thủ tướng athei kăl lăng kơ jăp hlŏh dơ̆ng bơ̆ jang pơrô̆ pơrôp, atŏk kơtang jơhngơ̆m đon hlô̆h vao găh sơnong jang, hơnăp jang, tơdrong kăl kơ bơ̆ jang bơngai ‘lŏ kră păng tơdrong tơgop đơ̆ng bơngai ‘lŏ kră. Atŏk kơtang jang ‘lơ̆ng, jơnei vei lăng tĕh đak hăm tơdrong jang kơ Khŭl păng vei lăng năng tông, tơgŭm djru bơngai ‘lŏ kră.

Tơblơ̆ nơ̆r: Amazưt