VOV4.Bahnar - Kơ sơ̆ 10/7, Thủ tướng Phạm Minh Chính bơ̆ jang hăm Khul kơ dră chĕp kơ̆l đảng plt Cần Thơ găh tơ drong bơ̆ jang kiơ̆ Tơ drong tơ chơ̆t đơ̆ng Anih tơm Chinh trĭ pơ jing păng atŏk tơ iung plt Cần Thơ truh sơ năm 2030, trong jang truh sơ năm 2045; Tơ drong tơ chơ̆t đơ̆ng Kuô̆k hô̆i găh jang pơ long năng 1,2 trong tơ gŭm gĭt kăl vă atŏk tơ iung plt Cần Thơ.

Jơ bơ̆ jang hăm Khul kơ dră chĕp kơ̆l Đảng plt Cần Thơ

Pơ ma lơ̆m jơ bơ̆ jang, Thủ tướng Phạm Minh Chính akhan, mă đơ̆ng hlôi iŏk đei lơ tơ drong jơ nei gĭt kăl, mă lei Cần Thơ oei đei lơ tơ drong tam mă pran, ‘lơ̆ng nhen: Đon adrin tam mă dêh, tam mă adrin tôch ai lơ̆m tơ drong chĕp kơ̆l pơ gơ̆r kơ na jang tŏk tam mă pran, athei tơ mât jên rơih trŏ tơ drong jang; atŏk tơ iung mŭk drăm tam mă tơ găl hăm tơ drong ‘lơ̆ng tơ̆ tơ ring. Thủ tướng athei, kơ dră chĕp kơ̆l plt pơ tho ăn dôm anih jang kơ pal, khul kơ dră tơ ring hơ nơ̆ng tơ blang hơ dăh, hơ len năng rim tơ drong đơ̆ng ‘ngoăih păng đơ̆ng lăm hai vă chih iŏk dôm tơ drong kăl pơ yoa ăn tơ drong chĕp kơ̆l pơ gơ̆r vă bơ̆ jang ‘lơ̆ng ƀiơ̆, đei yoa ƀiơ̆ tơ̆ hơ năp kơnh.

Dơ̆ng: Tơ blơ̆