VOV4.Bahnar - Ƀlep ƀât pơ gơ̆r "Năr tơ plih kơ sô̆ tơ̆ anih mong jên" yoa Anih mong jên tĕh đak Việt Nam pơ gơ̆r, ‘năr 4/8, Thủ tướng Phạm Minh Chính bơ̆ jang hăm Kơ dră chĕp kơ̆l Anih mong jên tĕh đak păng kơ dră chĕp kơ̆l dôm anih mong jên tĕch mơ dro. Thủ tướng athei dôm anih mong jên adrin găn ƀiơ̆ jên huach, tơ jur jên kon, jên asong tŏk iŏk, vang pŭ iŏk tơ drong mơ mat tat, tơ gŭm ăn anih tĕch mơ dro, bơ ngai tŏk iŏk jên păng tơ drong jang mŭk drăm lơ̆m khei ‘năr mơ mat tat hrei ‘nâu.

Dôm anih tĕch mơ dro athei kơ chăng, adrin hlŏh hlŏh dơ̆ng lơ̆m tơ drong tơ gŭm ăn dôm tơ drong jang, trong jang atŏk tơ iung mŭk drăm tơ pôl đơ̆ng Đảng păng tĕh đak, mă loi ‘nŏh asong tŏk iŏk jên vă pơm hnam oei ăn công nhân, bơ ngai đei jên khei tŏ sĕt. Thủ tướng pơ jao ăn Anih mong jên tĕh đak pơ jing trong jang, tơ drong tơ gŭm vă dôm anih mong jên kơ chăng vang jang, tưk tơ iung đon ‘lơ̆ng đơ̆ng anih tĕch mơ dro, hơ năp jang hăm tơ pôl păng jơ hngâm đon ‘mêm kơ pơ lei pơ la, tĕh đak păng kon pơ lei.

Dơ̆ng: Tơ blơ̆