VOV4.Bahnar - Kơ sơ̆ 20/3, hơ nơ̆ng năm hơ pong, bơ̆ jang tơ̆ dêh char Bình Phước, Thủ tướng Phạm Minh Chính păng khul jang đơ̆ng Khul kơ dră tĕh đak hlôi bơ̆ jang hăm Khul kơ dră chĕp kơ̆l đảng dêh char Bình Phước găh tơ drong jang atŏk tơ iung mŭk drăm, tơ pôl sơ năm 2021, 2 khei blŭng sơ năm 2022; tơ lĕch trong vă jang tŏk mŭk drăm tơ pôl lơ̆m sơ năm 2022 păng dôm sơ năm đơ̆ng rŏng dơ̆ng.

Thủ tướng Phạm Minh Chính bơ̆ jang hăm kơ dră chĕp kơ̆l dêh char Bình Phước

Pơ ma pơ tôch jơ bơ̆ jang, tơ̆ hơ năp kơnh, Thủ tướng Phạm Minh Chính athei kơ dră chĕp kơ̆l Dơ nŏ anih vei lăng kon pơ lei dêh char Bình Phước hơ tŏk jơ hngâm pran kơ dih, jang tŏk đơ̆ng tơ pang ti, đon rơ gei kơ dih, chă trong hơ tŏk jên thu, tơ jur jên jang, ‘mơ ‘met păng akŏm jơ hngâm tơ mât jên jang tŏk; athei chih hơ dăh tơ drong jang tơm, lê̆ tơ mât jên răh rai, tang găn tơ drong glăi xa pơ jĭp, pơ huach kư̆ kă. 

Găh tơ drong vă jang, Thủ tướng athei bơ̆ jang ‘lơ̆ng trong jang “Druh kiơ̆ sơ đơ̆ng ‘lơ̆ng, jang hơ bĕch hơ bal, tang găn ‘lơ̆ng jĭ COVID-19”, jang ‘lơ̆ng tơ drong jang tơ iung ming dơ̆ng păng jang tŏk mŭk drăm tơ pôl. Hơ nơ̆ng hŏk pơ hrăm, tơ lĕch jang ‘lơ̆ng tơ drong Tơ chơ̆t đơ̆ng Hop akŏm mă XIII kơ Đảng; tơ lĕch jang đei yoa tơ drong Tơ chơ̆t đơ̆ng Hop akŏm Đảng ƀô̆ dêh char ‘măng mă XI hăm tơ drong tơm ‘nŏh 3 trong jang tŏk pran găh anih jang, trong nơ năm, pơm hla ar păng hơ tŏk khul bơ ngai jang.

Dơ̆ng: Tơ blơ̆