VOV4.Bahnar - Lơ̆m kơ sơ̆ 6-3, Thủ tướng Phạm Minh Chính kŭm hăm bơ ngai tang măt ăn 1,2 anih tơm bơ̆ jang hăm kơ dră chĕp kơ̆l dêh char Kiên Giang vă hơ len năng tơ drong jang atŏk mŭk drăm, tơ pôl sơ năm 2021, 2 khei blŭng sơ năm 2022 păng trong vă jang tơ̆ hơ năp kơnh. Tơ̆ jơ bơ̆ jang, Bí thư đảng dêh char Kiên Giang Đỗ Thanh Bình ăn tơ băt, sơ năm 2021, Kiên Giang kŭm nhen lơ dêh char pŭ răm tôch dêh đơ̆ng jĭ COVID-19, mă lei 3 tơ ring jang mŭk drăm oei jang tŏk ‘lơ̆ng (mă đơ̆ng tŏ sĕt ƀiơ̆ ră) lơ̆m khei ‘năr oei đei lơ tơ drong mơ mat tat. Mŭk drăm tŏk ‘lơ̆ng GRDP tŏk 0,58%. Thu jên ăn tĕh đak hlŏh 11 rơ bâu ti.

Pơ ma pơ tôch jơ bơ̆ jang, Thủ tướng Phạm Minh Chính pôk pơ ư păng tơ chĕng ‘lơ̆ng dôm tơ drong jơ nei mă dêh char Kiên Giang iŏk đei khei ‘năr âu ki mă loi lơ̆m tơ drong tang găn jĭ, găh nŏh dơ̆ng, Thủ tướng oei pơ ma tơ ƀôh dôm tơ drong ưh kơ ‘lơ̆ng păng tơ lĕch trong vă jang tŏk. Thủ tướng athei, dêh char tơ gĕch iŏk rim tơ drong ‘lơ̆ng vă jang tŏk, bơ̆ jang mă pran, pơm ăn dôm tơ drong nol jing tơ drong ‘lơ̆ng, tơ drong mơ mat tat jing jơ hngâm pran. Jang tŏk mă pran mŭk drăm tơ̆ đak dơ sĭ, hơ tŏk trong hơ met ming choh jang xa, akŏm jơ hngâm jang tŏk ăn dôm hnam kơ măy jang pran ‘lơ̆ng, pơ jing tơ drong hiôk hian ăn tơ drong jang atŏk tơ iung mŭk drăm, tơ pôl.

Dơ̆ng: Tơ blơ̆