VOV4.Bahnar - Lăp đơ̆ng rŏng bơ̆ jang dăr lăng, Thủ tướng Phạm Minh Chính hăm Khul bơ̆ jang hlôi bơ̆ jang hăm pơlei tơm Hồ Chí Minh găh tơdrong jang mŭk drăm - tơpôl khei 7, 7 khei sơnăm păng mĭnh ƀar tơdrong vă jang tĕh đak tơmơ̆t jên jang tơm kơ pơlei tơm.

Tơroi tơbăt tơ̆ jơ bơ̆ jang, ƀok Phan Văn Mãi, Kơdră chĕp pơgơ̆r Dơnŏ anĭh vei lăng kon pơlei kơ Pơlei tơm Hồ Chí Minh tơbăt, atŏk GRDP 6 khei blŭng sơnăm kơ pơlei tơm Hồ Chí Minh tŏk 3,82%, lơ̆m au atŏk lơ̆m jăl 2 lơ hlŏh 3 ‘măng lơ̆m jăl 1. Găh tơdrong jang rim khei hơtuch sơnăm, pơlei tơm gô akŏm hơdrin iung jang keh đang 19 trong tơlĕch jang mŭk drăm-tơpôl đơ̆ng blŭng sơnăm Jơnŭm vei lăng kon pơlei hlôi pơdrơ̆ng kiơ̆. Păng Hơdrin iŏk đei nơ̆r pơkăp atŏk kơtang nhen trong tơlĕch ăn ‘nŏh đơ̆ng 6 - 6,5%. Iung pơma tơ̆ jơ bơ̆ jang, atŭm hăm hôn bơnê dôm tơdrong iŏk đei jơnei, Thủ tướng tĕh đak jei pơkă athei pơlei tơm Hồ Chí Minh kăl hơnơ̆ng dăr lăng, hơmet pơ ‘lơ̆ng tơnap tap, tơhlăk tơhlĭn ăn pơm tơlĕch, tĕch mơdro lơ̆m pơlei tơm; dăr lăng pơ đĭ, tơmơt dơ̆ng trong jang atŏk kơtang jang ‘lơ̆ng lơ̆m tơ iung pơjing Khŭl kơdră chĕp pơgơ̆r tơring kơdrơ̆m, hơmet pơ ‘lơ̆ng ăn tơmơ̆t jên jang, mơdro sa; hơdrin iŏk đei păng jang keh kong hlŏh nơ̆r pơkăp 19 trong tơlĕch ăn jang mŭk drăm-tơpôl sơnăm 2022. Thủ tướng jei pơjao tơdrong jang hơdăh ăn rim hơnĭh tơm, hơnĭh bơ̆ jang iung jang hơdoi, xek tơlang keh đang rim nơ̆r apĭnh, athei đơ̆ng pơlei tơm Hồ Chí Minh.

Tơblơ̆ nơ̆r: Amazưt