VOV4.Bahnar - Kơ sơ̆ ‘năr 19/8, Thủ tướng Phạm Minh Chính bơ̆ jang trực tuyến găh tơ drong jang hơ tŏk tơ iung anih tĕch mơ dro hăm anih jang tang măt mơ dro sa Việt Nam tơ̆ teh đak đe. Tơ̆ hop akŏm, Thủ tướng teh đak kŭm hăm Anih tơm vei lăng găh Kơ măy kơ mŏk Mơ dro sa, dôm Anih tơm, anih jang hop akŏm trực tuyến hăm anih jang vei lăng găh mơ dro sa Việt Nam tơ̆ teh đak đe hlôi pơ ma dơ nuh dôm trong jang hơ tŏk ‘lơ̆ng đei yua tơ drong jang mơ dro sa, hơ tŏk tơ iung păng đei lơ anih tĕch mơ dro, pơm lăp hăm ‘meh vă, hơ năp jang lơ̆m chăl ‘nao.

Jơ bơ̆ jang

Dôm anih tĕch mơ dro Việt Nam tơ̆ teh đak đe hlôi akŏm roi tơ băt găh tơ mam ‘lơ̆ng, ‘meh vă đơ̆ng rim anih jang mơ dro sa; athei đơ̆ng rim anih mơ dro sa âu; dôm trong jang vă pơm lăp ‘meh vă, athei đơ̆ng anih tĕch mơ dro. Kiơ̆ tơ roi tơ băt đơ̆ng Anih tơm vei lăng găh Kơ măy kơ mŏk Mơ dro sa, sơ năm 2021, jên mơ dro sa hamw teh đak đe kơ Việt Nam iŏk đei hloh 670 ti USD, hơ nhăk Việt Nam mơ̆t lơ̆m grŭp 20 teh đak mŭk drăm đei tơ drong jang mơ dro sa hăm teh đak đe tih hloh jơ̆p plei teh. 7 khei blŭng sơ năm 2022, jên mơ dro sa hăm teh đak đe kơ Việt Nam iŏk đei hloh 433 ti USD. Tơ dra hơ drol pơ đĭ sơ năm, jên mơ dro sa hăm teh đak đe gô iŏk đei dang 800 ti USD, hơ nhăk Việt Nam yak tŏk grŭp 10-15 teh đak jang mŭk drăm đei tơ drong jang mơ dro sa hăm teh đak đe tih hloh jơ̆p plei teh.

Thuem: Tơ blơ̆