Pơtôch jơ bơ̆ jang, Thủ tướng Phạm Minh Chính lăng ‘lơ̆ng, pôk pơ ư pơlei tơm Hồ Chí Minh lơ̆m tơdrong đei lơ mơ mat tat, long nol mă lei hlôi iŏk đei lơ jơnei ‘lơ̆ng lơ̆m hơtŏk tơiung mŭk drăm tơpôl, tơchĕng hơdrol đei 15/19 tơdrong hơgăt iŏk đei păng yak hloh tơdrong hơgăt. Găh hơnăp jang tơ̆ hơnăp kơnh, Thủ tướng thei, pơlei tơm Hồ Chí Minh kăl kơ pơgơ̆r dăr hơlen dơ̆ng pơ đĭ tơdrong jang vă yak mơ̆t lơ̆m sơnăm 2023 hăm tơdrong hơiă ‘nao. Ƀơ̆t măt, pơlei tơm athei akŏm lơ̆m tơdrong jang proh hơmet; tŭn pran kơtang tơlĕch jên tơmơ̆t jang teh đak păng 3 tơdrong jang tơm kơ teh đak.

Lơ̆m noh pơlei tơm jang hơdai hăm dôm anih tơm, anih jang hơmet pơ ‘lơ̆ng đĭ dôm tơdrong tơhlăk tơhlĭn, pơtrŭt 5 tơdrong jang tơm ‘noh: dôm tơdrong jang trong gre treng anih kơdrơ̆m; trong ver 3 pơlei tơm; Anih gre dơ̆ng T3 cham gre păr apŭng plĕnh teh Tân Sơn Nhất; trong gre kơdâu hrĕnh pơlei tơm Hồ Chí Minh – Mộc Bài, Tây Ninh. Hơdai hăm ‘noh, pơlei tơm Hồ Chí Minh kăl kơ hơnơ̆ng dôm tơdrong jang tang găn jĭ COVID-19, mă loi ‘noh jĭ ƀet vaccine tang găn jĭ vă vei lăng jĭ hơbuh.