Tơ̆ jơ tơƀơ̆p, pêng Thủ tướng hlôi roi tơbăt ăn băl găh tơdrong rim teh đak, pơma dơnuh dôm trong jang vă hơtŏk loi dơ̆ng jang hơdai đơ̆ng pêng teh đak lơ̆m hơtŏk tơiung mŭk drăm - tơpôl, kŭm nhen dôm tơdrong apŭng plĕnh teh păng tơring vang bơngơ̆t truh.

Pêng Thủ tướng drơ̆ng 1 nơ̆r vang hơdai băl tŭn pran pơjing mŭk drăm hiôk hian, pơm tơm kơ dih tơklep hăm mơ̆t jang hơdai apŭng plĕnh teh tôm tơdrong; hơtŏk loi dơ̆ng tơgoăt đei yua pêng mŭk drăm, lăng ‘nâu jĭ dôm tơdrong pơ ‘nhŏ hơdrol bơ̆jang đơ̆ng pơđĭ pêng teh đak tơ̆ hơnăp kơnh. Pêng Thủ tướng drơ̆ng 1 nơ̆r gô hơnơ̆ng pơvei, tơƀơ̆p pơma dơnuh 2 pang, pêng pang hơnơ̆ng, lơ̆m noh đei tơdrong jang hơdai jăh pơgơ̆r Hop akŏm tih găh Gơlang Hơtŏk tơiung Campuchia-Lào-Việt Nam ‘măng mă 12 (tơ̆ Campuchia) păng tŭn pran tơlĕch jang tơgoăt 3 mŭk drăm Campuchia-Lào- Việt Nam truh sơnăm 2030.