VOV4.Bahnar - Pơ gê 31/7, Thủ tướng Phạm Minh Chính truh dăr lăng, bơ̆ jang păng pơ ma nuh găh trong hơ met pơ ‘lơ̆ng mơ mat tat, tơ hlăk tăk lơ̆m Tơ drong pơih xă tơ drong jang xa jăl 2 tơ̆ Hnam kơ măy pơm mam pơ sei Thái Nguyên. Đei tơ lĕch jang đơ̆ng sơ năm 2007, hăm kơ sô̆ jên tơ mât jang blŭng a truh 3.800 ti, mă lei tơ drong jang ‘nâu truh dang ei tam mă kĕh păng oei đei lơ tơ drong mơ mat tat, tơ hlăk tăk.

Thủ tướng hơ len năng tơ drong jang pơih xă jăl 2 Hnam kơ măy pơm mam pơ sei Thái Nguyên

Đơ̆ng rŏng năm dăr lăng, Thủ tướng pơ gơ̆r jơ bơ̆ jang hăm dôm anih tơm, anih jang kơ pal, tơ ting tơ rang, anih tĕch mơ dro vă chă mơ̆ng nơ̆r pơ ma, apinh đơ̆ng dôm pang đei ƀơm truh. Thủ tướng pơ ma hơ dăh, tơ drong kăl hlŏh ‘nŏh jăh chă đei trong jang ‘lơ̆ng hlŏh vă tơ roi ăn anih jang kơ pal set hơ len, tơ chơ̆t, đơ̆ng rŏng kơ hơ len năng, pơ ma nuh, tơ blang hơ dăh kiơ̆ đơ̆ng yă âu, lăng kiơ̆ khoa hŏk, khôi luơ̆t, gơ̆h ‘mơ ‘met hlŏh, đei yoa lơ hlŏh ăn tĕh đak păng anih tĕch mơ dro.

Đơ̆ng rŏng mơ̆ng hla ar chih tơ roi, Thủ tướng pơ ma hơ dăh, ‘nâu jĭ tơ drong jang pơ dui đunh, jang ưh đang lơ sơ năm, athei akŏm jơ hngâm sek tơ lang pơ kĕh kiơ̆ luơ̆t, ‘moi kiơ̆ dôm nơ̆r pơ tho đơ̆ng Anih tơm Chinh trĭ, nơ̆r tơ chơ̆t đơ̆ng dăr hơ len.

Dơ̆ng: Tơ blơ̆