Pơgê năr 14/11, Dơnŏ anĭh tơm Pơprŏ tơmơ̆t jên jang pơgơ̆r hop akŏm tơbăt găh Hop akŏm tơlĕch jang kiơ̆ Tơdrong tơchơ̆t kơsô̆ 23-NQ/TW kơ Dơnŏ anĭh tơm Chinh trĭ găh trong vang atŏk tơ iung mŭk drăm-tơpôl, sơđơ̆ng tĕh đak, sơđơ̆ng tơring Tây Nguyên trŭh sơnăm 2030 gô đei pơgơ̆r tơ̆ Đà Lạt, dêh char Lâm Đồng. Kiơ̆ kơ ‘nŏh hop akŏm gô đei pơgơ̆r đơ̆ng năr 20-11-2022, kơ yuơ Thủ tướng Tĕh đak Phạm Minh Chính pơm tơm. Hăm hơnăn “Atŏk tơ iung ‘lơ̆ng-‘Lơ̆ng hơ iă-Kơjăp ‘lơ̆ng”, ‘nau jing Hop akŏm “3 lơ̆m 1”, đei pơgơ̆r hăm tơdrong tơm tơbăt hơdăh Tơdrong jang đơ̆ng Khŭl kơdră tĕh đak jang kiơ̆ Tơdrong tơchơ̆t 23 găh trong atŏk tơ iung mŭk drăm-tơpôl păng sơđơ̆ng tĕh đak, sơđơ̆ng dơ̆ng kơ jăp tơring Tây Nguyên trŭh sơnăm 2030, lăng trŭh sơnăm 2045.

Adoi pơtrŭt tơmơ̆t jên jang, krao hơvơn rim bơngai tơmơ̆t jên jang, khŭl mơdro sa lơ̆m tĕh đak, tĕh đak đe lăng trŭh vang iung jang hơdoi hăm Khŭl kơdră Tĕh đak lơ̆m tơlĕch jang kiơ̆ rim tơdrong jang, tơdrong vă jang tơmơ̆t jên jang gĭt kăl ăn atŏk tơ iung mŭk drăm-tơpôl kơ tơring Tây Nguyên.