VOV4.Bahnar - Pơ gê ‘năr 7/8, Thủ tướng teh đak Phạm Minh Chính bơ̆ jang hăm kơ dră chĕp kơ̆l dôm anih tơm, anih jang iŏk jang păng pơ lei tơm Hà Nội vă hơ met pơ ‘lơ̆ng mơ mat tat, tơ hlăk tơ hlĭn, pơ trŭt tơ drong ming man “ Trong gre treng anih kơ drơ̆m pơ long lăng pơ lei tơm Hà Nội, trong Nhổn - anih gre dơ̆ng Hà Nội. Lăp đơ̆ng rŏng kơ năm hơ len lăng tơ drong jang, Thủ tướng teh đak Phạm Minh Chính hlôi đei jơ bơ̆ jang kơ tă hăm pơ lei tơm Hà Nội, dôm anih tơm ƀơm truh, bơ ngai iŏk jang đơ̆ng tơ drong jang pơm trong gre treng anih kơ drơ̆m pơ long lăng trong Nhổn - anih gre dơ̆ng Hà Nội vă hơ met pơ ‘lơ̆ng mơ mat tat tơ hlăk tơ hlĭn ƀơm truh tơ drong jang. Pơ tôch ‘măng hop a kŏm, Thủ tướng Phạm Minh Chính tơ roi hơ dăh, tơ drong tơm păng hơ năp jang pơm ăn hiơ̆ kơ jang, jên jang găh tơ ‘ngla tơ mơ̆t jên jang, pơ lei tơm Hà Nội, rim anih jang roi tơ ƀôh, dôm bơ ngai iŏk jang; tơ drong jang hơ dai đơ̆ng rim anih tơm, anih jang păng pơ lei tơm Hà Nội tam mă kơ jăp, đei yua. Thủ tướng athei rim anih tơm, anih jang păng Hà Nội athei kơ chăng, hơ drin jang kiơ̆ dôm hơ năp jang, trong jang hlôi đei drơ̆ng nơ̆r, veh ver kơ atŭm atŭm, tơ tŭn tơ năp jang; tơ dăh đei tơ hlăk tơ hlĭn ‘noh anih jang pơ gơ̆r athei krao akŏm rim anih jang ƀơm truh vă hơ met pơ ‘lơ̆ng kiơ̆ ƀlep tơ drong hơ găt bơ̆ jang đơ̆ng Khŭl kơ dră teh đak.

Thuem: Tơ blơ̆