‘Năr 1/3, lơ̆m ‘măng năm bơ̆ jang tơ̆ dôm dêh char găh tơring Tŏk bŏk, Thủ tướng Phạm Minh Chính năm dăr lăng dôm tơdrong jang pơm trong gre tơm đei: Trong gre kơdâu hrĕnh Quảng Ngãi – Hoài Nhơn, jăl trong klĕch trong trôm Đức Phổ păng trong trôm Bình Đê; trong gre kơdâu hrĕnh Hoài Nhơn- Quy Nhơn păng tơdrong jang pơm trong gre păr jur tŏk kơsô̆ 2 păng dôm tơdrong jang pơm cham gre păr Phù Cát, dêh char Gia Lai.

Tơ̆ Anih jang man trong gre păr jur tŏk kơsô̆ 2 păng dôm tơdrong jang pơm cham gre păr Phù Cát, dêh char Gia Lai, Thủ tướng pôk pơ ư jơhngâm đon jang tơnăp đơ̆ng khul ki sư, công nhân, ‘mi pă lăng, prăng pă pơdơ̆h. Dăr lăng tơ̆ yăn âu păng mơ̆ng nơ̆r pơma tơ̆ anih oei ming man, Thủ tướng athei dôm anih jang đei ƀơm truh adrin jang hrĕnh ƀĭơ năr hơgăt truh 3 khei, pơm ‘lơ̆ng vă ƀât blŭng jăl khei mă III/2026 gơ̆h tơmât yoa, tơplih ăn khei 9/2026 nhen hlôi tơlĕch adrol ki, atŭm hăm ‘nŏh athei tơ̆ hơnăp kơnh bơ̆ jang mă ‘lơ̆ng vă jăh tơmât yoa tơdrong jang âu; pơjao ăn dêh char Gia Lai iŏk vei lăng păng tơmât yoa Cham gre păr Phù Cát kiơ̆ trong "bu jang ‘lơ̆ng hlŏh pơjao ăn bơngai ‘nŏh".