VOV4.Bahnar - Đơ̆ng rŏng kơ Anih chih răk liên bang Mi hơ tŏk jên cheh thim 0,75 điêm pơ tih kơ hrĕng lơ̆m gơ măng brei păng dôm anih mong jên trung ương châu Âu păng lơ teh đak nai hlôi lơ ‘măng hơ tŏk jên cheh vă tơ jră hăm tơ drong hơ tŏk kơ jă lơ tơ jê̆ âu, pơ gê ‘năr 28/7, Thủ tướng Phạm Minh Chính hlôi pơ gơ̆r ‘măng hop akŏm hăm 1,2 kơ dră tơm păng kơ dră chĕp kơ̆l dôm anih tơm, anih jang akŏm pơ ma dơ nuh dôm trong jang, tơ drong tơ gŭm lăp hăm pơ đi hloi ƀơ̆t măt păng đunh đai vă hơ nơ̆ng vei lăng hơ tŏk kơ jă lơ, sơ đơ̆ng mŭk drăm tih păng pơ trŭt tơ iung ming, hơ tŏk tơ iung mŭk drăm tơ pôl. Thủ tướng tơ tă, mŭk drăm teh đak bơ̆n đei tơ drong pơ̆ih tih, bơ̆ jang oei ưh kơ ‘lơ̆ng, tơ drong kĕ tơ jră đei tŏ sĕt, kơ na lăp kăl 1 tơ drong tơ plih iĕ tơ̆ ‘ngoăih gô ƀơm ưh kơ ‘lơ̆ng tih truh lơ̆m teh đak. Tơ̆ hơ năp tơ drong ‘noh, Thủ tướng athei rim anih tơm, anih jang, tơ ring akŏm kiơ̆ hơ len, băt hơ dăh tơ drong, ưh kơ gơh pơm pơ hơi, hơ tŏk ‘lơ̆ng tơ drong jang tơ blang hơ dăh, tơ dra hơ drol, kơ chăng đei tơ drong jang tơ gŭm hrĕnh păng trong jang mă lăp, tơ tom, ‘lơ̆ng, khoa hŏk, đei yua pơ đĭ hloi ƀơ̆t măt păng đunh đai.

Thuem: Tơ blơ̆