Kơmăng năr 24/11, tơ̆ Pơlei Joh ayŏ – Tơmang pơhiơ̆ kon pơlei kon kông Việt Nam, Thủ tướng Phạm Minh Chính năm akŏm Lêh pơtơm Giĕng “Tơguăt tơguăl kon pơlei kon kông  – Mŭk drăm joh ayŏ Việt Nam” sơnăm 2025 hăm hơnăn “Tơguăt tơguăl minh jơhngơ̆m đon  – Tơrĕk hăm tơring Tŏk bŏk” păng krao hơvơn anih jang mŭk drăm, kon pơlei atŭm jơhngơ̆m tơgŭm kon pơlei tơring Tŏk bŏk – Tây Nguyên hơmet 'mi kial đak hơbông pơrăm. Tơdrong akŏm pơtơm hăm ƀai chih tơroi kơ dôm tơdrong răm krưp yuơ 'mi kial đak hơbông pơrăm. Thủ tướng teh đak hơvơn rim khul grŭp “atŭm vang glơng rim tơnap tap”, lui ngeh hăm jơhngơ̆m pran tơguăt tơguăl tôm kon pơlei gô tơgŭm teh đak găn hloh tơnap tap, pơtoi hơtŏk tơ-iung kơjăp. Ah jơ lêh, rim anih jang mŭk drăm, jơnŭm jang hlôi tơgop 540 tih hlj tơgŭm ăn kon pơlei ƀơm 'mi kial đak hơbông pơrăm.

Kơsơ̆ năr 24/11, tơ̆ Hơnih bơ̆ jang Khul kơdră chĕp pơgơ̆r Teh đak, Thủ tướng Phạm Minh Chính atum hăm kơdră chĕp pơgơ̆r Khul kơdră chĕp pơgơ̆r Teh đak hăm tơpôl Hơnih bơ̆ jang ăn Khul kơdră chĕp pơgơ̆r Teh đak vang tơgŭm djru ăn kon pơlei tơring Tŏk bŏk hiong răm kơ yuơ ‘mi kial đak lip pơrăm hăm trong jang “ ‘Mêm mơnat, tơgŭm djru dih băl”, rim kang ƀô̆, bơngai jang vang chă tơgop tŏ sĕt hloh 1 năr jên khei. Thủ tướng athei rim hơnih bơ̆ jang ƀơm truh tĕnh koăng pơm pơkeh trong vă pơjing Tơdrong tơchơ̆t găh tơdrong jang păng trong iung jang kăl vă hơmet pơ ‘lơ̆ng tŏ ‘mi kial pơrăm, tĕnh koăng pơm sơđơ̆ng tơdrong hơrih sa kơ kon pơlei păng hơmet pơ ‘lơ̆ng jang sa, pơm tơlĕch tĕch mơdro tơmam drăm. Atŭm hăm ‘noh, Thủ tướng pơrô̆ athei atŏk kơtang rim trong jang pơtrŭt kơtang tŏk muk drăm tơklep hăm vei lăng kơjăp tơdrong kơjă tŏk jur lơ̆m dôm khei uơ oei kơ sơnăm, sơđơ̆ng tơdrong hơrih sa tơpôl păng vei kơjăp sơđơ̆ng dơ̆ng kơjăp.