VOV4.Bahnar - Gơ măng ‘năr 27/2, Thủ tướng Phạm Minh Chính truh akŏm păng iung pơ ma lơ̆m tơ drong tơ băt Năr ƀok thây pơ gang Việt Nam 27/2 “Linh ao kok”. Thủ tướng Phạm Minh Chính tang măt ăn kơ dră chĕp kơ̆l Đảng, tĕh đak pơ truh nơ̆r hơ iă, nơ̆r bơ nê tôch dêh hăm đe ƀok thây pơ gang, bơ ngai jang pơ gang lơ̆m tĕh đak, dôm bơ ngai hơ nơ̆ng chih tơ ƀôh jơ hngâm đon ‘lơ̆ng hơ iă, kăp gĭt đơ̆ng Anih jang pơ gang; mă loi ‘nŏh ƀât mă hơ drĕch hơ drung bơ̆n oei adrin yak hlŏh mơ mat tat, tơ guăt 1 jơ hngâm bơ̆ jang tang găn jĭ Covid-19.

Thủ tướng Phạm Minh Chính iung pơ ma lơ̆m jơ tơ băt

Thủ tướng pơ ma hơ dăh, kơ dră chĕp kơ̆l Đảng, tĕh đak, dôm anih jang đảng păng khul kơ dră tơ ring, kŭm hăm đĭ đăng kon pơ lei hơ nơ̆ng tơ chĕng ‘lơ̆ng, hlôh vao păng tơ gŭm ăn tơ drong mơ mat tat, glĕh hrat, plang jơ hngâm đơ̆ng anih jang pơ gang, ƀak si păng bơ ngai jang pơ gang. Thủ tướng athei dôm anih jang, khul grŭp, dôm tơ ring păng kon pơ lei lơ̆m tĕh đak hơ nơ̆ng akŏm jơ hngâm ăn tơ drong ƀet bơ̆ng, lơ̆m nŏh hơ tŏk tơ drong ƀet vaccine ăn hơ iŏh mă sơ đơ̆ng ‘lơ̆ng, đei yoa vă vei lăng jơ hngâm pran ăn kon mon păng tơ gŭm ăn đe mon năm hŏk dơ̆ng tơ̆ hnam trưng sơ đơ̆ng ‘lơ̆ng.

Dơ̆ng: Tơ blơ̆