Vă đĭ đăng dôm nơ̆r tơgop tơ̆ hop akŏm tă kơ drơ̆ng nơ̆r akhan, kơsô̆ jang tŏk GDP 8,02% sơnăm 2022 ‘noh tôch kơ ‘lơ̆ng. GDP jô̆ păh lăp kơ̆l bơngai sơnăm 2022 hơtŏ dang 4.110 USD, tŏk 393 USD pơtêng hăm sơnăm 2021. Iung pơma pơtôch hop akŏm, Thủ tướng teh đak Phạm Minh Chính pơma hơdăh, dôm jơnei iŏk đei kơ sơnăm 2022 lơ hloh sơnăm 2021 ‘noh jĭ tơƀôh hơdăh ăn jơhngơ̆m pran tơgoăt tơgoăl đĭ đăng hơdrĕch hơdrŭng, 1 jơhngơ̆m đon hơdrin đơ̆ng pơđĭ khŭl jang chĭnh trĭ păng kon pơlei lơ̆m teh đak hăm tơdrong chĕp kơ̆l đơ̆ng Đảng.

Vă jang kiơ̆ jơnei tơdrong tơm, hơnăp jang tơlĕch trong jang hơtŏk tơiung mŭk drăm - tơpôl sơnăm 2023 kiơ̆ tơdrong Tơchơ̆t đơ̆ng Kuôk hô̆i, tơ̆ Hop akŏm trực tuyến đơ̆ng Khŭl kơdră teh đak hăm dôm tơring pơtôch tơdrong jang sơnăm 2022, tơ lĕch trong jang hơtŏk tơiung mŭk drăm - tơpôl sơnăm 2023; Khŭl kơdră teh đak hlôi tơlĕch ăn 6 tơdrong jang tơm pơgơ̆r vei lăng păng 11 grŭp hơnăp jang, trong jang găh lơ hơtŏk tơiung mŭk drăm - tơpôl sơnăm 2023.