Thủ tướng Phạm Minh Chính sơkơ̆t hơdăh, Việt Nam hơnơ̆ng lăng EU ‘nŏh khŭl jang hơdoi tơm hlŏh lơ̆m trong jang tơbôl kơ Việt Nam. Thủ tướng pơma hơdăh, mŭk drăm rơgŏh, mŭk drăm klŏh klĕch păng atŏk tơ iung kơjăp ‘nŏh jing trong tơm ăn atŏk tơ iung muk drăm-tơpôl kơ rim tĕh đak, rim tơring, hơnĭh mơdro sa păng hơnhăk đei jơnei ăn lơ tĕh đak.

Khŭl kơdră tĕh đak Việt Nam hlôi tơƀô̆h hơdăh jơhngơ̆m đon hơdrin păng hơpơi ‘mĕh vă pơjing đei hơyak pran kơtang păng jơnei hlŏh dơ̆ng lơ̆m khei năr kơnh hăm tơdrong kĭ pơkăp Trong jang kăl tĕh đak găh atŏk tơ iung rơgŏh jăl jang 2021-2030, lăng trŭh sơnăm 2050. Jĭ mĭnh tĕh đak tŏk bŏk atŏk tơ iung, mă lei Việt Nam pơ̆n tơlĕch nơ̆r pơkăp kơtang găh atŏk tơ iung kơjăp ‘lơ̆ng. Việt Nam hlôi atŭm hăm vă jê̆ 150 tĕh đak pơkăp hơnhăk ‘nhui kơnê̆ lê̆ pă “0” lơ̆m tŏk bŏk anglŏ sơnăm; atŭm hăm hlŏh 100 tĕh đak vang pơm kiơ̆ Nơ̆r pơkăp pơm tơjur iă metan lơ̆m plei tĕh ƀơ̆t sơnăm 2030.