Tơbang ƀai đŏk ăh 'năr lêh, Thủ tướng teh đak bơ̆n Phạm Minh Chính ƀrơ̆k jơhngơ̆m vih tơbăt tơdrong erih păng tơdrong jang kăch mạng đơ̆ng ƀok Võ Văn Kiệt, Thủ tướng xơkơ̆t, tơdrong erih păng jang kăch mạng đơ̆ng ƀok Võ Văn Kiệt jing tơdrong gơh rơgei kơ bơngai linh kăch mạng nuih mơng, kơdră gơh rơgei, plang đĭ hnưr erih kơyuơ teh đak păng kon pơlei.

Hăm tơdrong hơtŏ hơnơ̆ng rơngei hiôk hian, pơma xa tơnăp tơguăt hăm tơdrong đei ƀôh, pơma yak hadoi hăm pơm jang, ƀok Võ Văn Kiệt hlôi tơgop kăp gĭt lơ̆m tơdrong hơvơn tôm Kon pơlei hăt hot pơm kiơ̆ pơkăp tơplih 'nao kơyuơ Đảng tơlĕch păng pơgơ̆r. Thủ tướng ră hơdăh, adrol kơ tơlĕch tơchơ̆t kăp gĭt yơ, mă kăl noh dôm tơchơ̆t đei tơrĕk truh hơtŏk mŭk drăm – tơpôl teh đak păng tơdrong erih kon pơlei, Ƀok adoi apinh nơ̆r pơma đơ̆ng rim bơngai juăt jang păng kơdih po chă hơlen, tơmơ̆ng nơ̆r tơgop đơ̆ng kon pơlei.