VOV4.Bahnar - Pơ gê 24/7, lơ̆m ‘măng năm hơ pong păng bơ̆ jang tơ̆ Nghệ An, Thủ tướng Phạm Minh Chính păng khul jang truh hơ pong, bơ̆ jang hăm Anih chĕp kơ̆l khul linh Quân khu 4. Pơ ma tơ̆ âu, Thủ tướng Phạm Minh Chính pơ ma hơ dăh, "ưh đei quân khu yơ đei lơ pơ sat linh nhen quân khu 4, đei lơ bơ ngai lôch tơ̆ groi tĕh Quân khu 4. Quân khu 4 athei jang ‘lơ̆ng hlŏh dơ̆ng tơ drong jang tơ gŭm ăn bơ ngai đei kŏng, bơ̆ jang dŏng tơ gŭm, pơ jing tơ drong ‘lơ̆ng hlŏh dơ̆ng ăn kon pơ lei, rim bơ ngai lơ̆m tĕh đak bơ̆ jang, tơ ƀôh jơ hngâm ‘mêm bơ nê kơ bơ ngai, unh hnam đei kŏng, năm hơ pong tơ̆ pơ sat linh, sŏh nhang, ƀlŏk hơ dơ̆r kơ đe linh lôch tang tĕh đak”. Lơ̆m 2 tơ drong tơ blăh tang găn ayăt Phalăng păng Mi păng vei lăng tĕh đak, tơ ring Quân khu đei 198.659 ‘nu linh lôch tang tĕh đak, 113.597 ‘nu linh rơ ka, 12.316 ‘nu Mĕ Việt Nam nuih mơng, 51.286 ‘nu bơ ngai răm đơ̆ng pơ gang dioxin.

Thủ tướng bơ̆ jang hăm Anih chĕp kơ̆l pơ gơ̆r khul linh Quân khu 4

Kơ sơ̆ ‘năr 24/7, Thủ tướng teh đak Phạm Minh Chính bơ̆ jang hăm khŭl kơ dră chĕp kơ̆l Anih jang Đảng dêh char Nghệ An găh tơ drong tơ lĕch jang, pơ tôch bơ̆ jang kiơ̆ Tơ drong tơ chơ̆t Hop akŏm XIII kơ Đảng păng tơ drong tơ chơ̆t Hop akŏm Đảng bộ dêh char ‘măng mă XIX, jăl jang 2020 – 2025. Kiơ̆ tơ roi tơ băt đơ̆ng dêh char Nghệ An, 6 khei blŭng sơ năm 2022, Akŏp tơ mam lơ̆m tơ ring jô̆ pơ hlom tŏk 8,44% (dơ̆ng mă 2 tơ ring găh tu tŏk bŏk, dơ̆ng mă 18/63 dêh char, pơ lei tơm găh Trung ương). Hơ nih pơ vih pơ văn đei tơ iung ming pran kơ tang, jô̆ pơ hlom tŏk 9,22%. Tơ̆ jơ bơ̆ jang, kơ dră chĕp kơ̆l dêh char Nghệ An hlôi tơ roi nơ̆r apĭnh hăm Khŭl kơ dră teh đak, Thủ tướng teh đak găh tơ drong hơ met ming trong vă jang pơm Cham gre păr apŭng plĕnh teh Vinh vă hơ tŏk kơ sư̆k truh sơ năm 2030 đơ̆ng 08 triệu tŏk 12 triệu ‘nu tơ moi 1 sơ năm; athei tơ chă trong jang găh kon jên vă tơ lĕch jang pơm trong gre kơ dâu hrĕnh Viêng Chăn - Hà Nội; athei Thủ tướng păng rim anih tơm, anih jang Trung ương bơ ngơ̆t truh tơ gŭm jên hrŭ ‘mong iŏk teh pơm hơ met ming, pơ̆ih să trong gre kơ sô̆ 1, trong năm klĕch tơ ring Nghệ An...

Thủ tướng bơ̆ jang hăm Khŭl kơ dră chĕp kơ̆l Anih jang Đảng dêh char Nghệ An

Đơ̆ng rŏng kơ mơ̆ng nơ̆r tơ gop pơ ma dơ nuh tơ̆ jơ bơ̆ jang, Thủ tướng teh đak Phạm Minh Chính tơ roi rơ đăh, dêh char kăl kơ dăr hơ len dơ̆ng dôm tơ drong jang yua đơ̆ng jên đei tŏ sĕt, athei rơ̆ih tơ drong tơm, kăl, hrơ̆ch 1 ‘măng, jang tơ drong hơ yơ đang tơ drong ‘noh. Sơng đei tơ mơ̆t jên jang đei lơ tơ plih ‘nao, mă lei tam mă đei lơ ‘lơ̆ng, tam mă đei dôm anih jang mơ dro sa tih tơ mơ̆t jên jang lơ̆m âu... Tơ̆ hơ năp kơnh, Nghệ An kăl kơ pơ trŭt đon tơ chĕng tơ plih ‘nao, lăng tơ drong jang, iŏk jang tôch ai tơ mam đei hơ drô̆, tơ drong hiôk ‘lơ̆ng, tơ drong kĕ pơ jei, hơ vơn rim kon jên trŏ luơ̆t đơ̆ng tơ pôl, kon pơ lei vă hơ tŏk tơ iung.

Dơ̆ng hăm Thuem: Tơ blơ̆