VOV4.Bahnar - ‘Năr 8/2, ƀlep ƀât tơ băt 92 sơ năm năr pơ jing Đảng cộng sản Việt Nam păng năm bơ̆ jang dơ̆ng đơ̆ng rŏng kơ pơ dơ̆h Tết Nguyên đán Nhâm Dần 2022, Thủ tướng Phạm Minh Chính năm hơ pong păng hmach thơ thou Tết ăn kăn ƀô̆, bơ ngai jang tơ̆ Anih mong jên tĕh đak Việt Nam păng rim anih jang găh jên hu.

Sơ năm 2021 Anih mong jên tĕh đak Việt Nam tơ lĕch trong pơ dui khei ‘năr kla jên hre, hơ met ming khei ‘năr kla hre, ưh iŏk jên kon. Dang 600.000 ‘nu tơ moi hăm kơ sô̆ jên tŏk iŏk hlŏh 280.000 ti đei hơ met ming khei ‘năr kla jên hre; vă jê̆ 2 triu ‘nu tơ moi hăm kơ sô̆ jên tŏk iŏk hlŏh 4 triu ti đei tơ jur, ưh iŏk jên kon; tơ jur, ưh iŏk hlŏh 2.500 ti hlak jên pơ vih pơ văn, asong tŏk iŏk hăm dôm anih iŏk bơ ngai jang, bơ ngai jang kiơ̆ đơ̆ng Anih mong jên tơ gŭm tơ pôl...

Sơ năm 2022, tơ dra adrol mŭk drăm apŭng plenh tĕh păng lơ̆m tĕh đak oei đei lơ tơ drong krê, ưh sơ đơ̆ng yoa đơ̆ng jĭ Covid-19. Thủ tướng athei rim anih mong jên hơ nơ̆ng kơ chăng, bơ̆ jang hơ bĕch hơ bal, hrơ̆ch ‘lơ̆ng dôm tơ drong tơ gŭm găh jên hu, tơ lĕch jang ‘lơ̆ng, đei yoa dôm tơ drong tơ gŭm jang tơ iung ming, jang tŏk mŭk drăm, tơ gŭm ăn kon pơ lei păng anih tĕch mơ dro gơ̆h tŏk iŏk jên hiôk hian vă jang xa, tĕch mơ dro.

Dơ̆ng: Tơ blơ̆