Hop akŏm đei tơroh trư̆k twê̆n hăm 63 dêh char, pơlei tơm lơ̆m jâ̆p teh đak. Pơma ăh hop akŏm, Thủ tướng Phạm Minh Chính pơkăl, khei năr truh, Anih tơm Axong jang kăl jang tơnăp xơnong jang kơ po, chĕp vei tơnăp hloh xơnong kơ anih jang tơgŭm ăn kơ Đảng, Khul kơpal teh đak, pơtoi adrin hloh dơ̆ng lơ̆m tơdrong pơgơ̆r axong jang mŭk drăm tơm, hơlen tơnăp dôm tơdrong đei ƀôh lơ̆m tơring păng lơ̆m kơpal teh; băt hơdăh tơdrong hiôk, tơnap tap; hơtŏk tơdrong tơroi tơbăt, kơchăng chih akŏm vă tom tơgŭm trong jang hăm Jơnŭm pơgơ̆r teh đak, Thủ tướng teh đak bơ̆n găh dôm trong pơgơ̆r jang păng pơm kiơ̆ dôm Tơchơ̆t đơ̆ng Đảng, Kuôk hô̆i păng Jơnŭm pơgơ̆r teh đak.

Atŭm hăm noh, Thủ tướng pơkăl, Anih tơm Axong jang hơtŏk pran tơplih kơsô̆ kơ teh đak lơ̆m tôm tơdrong jang tŏk bŏk đei vei lăng; hơtŏk hơmet pơ-'lơ̆ng hla bar hanh chĭnh, hơtŏk tơdrong jang hơdăh hlăng 'lơ̆ng.