‘Măng năm ngôi, bơ̆jang tơ̆ Liên Bang Nga ‘măng âu đơ̆ng Thủ tướng Phạm Minh Chính đei tơdrong ‘lơ̆ng gĭt kăl vă hơtŏk loi dơ̆ng hơmet ming tơdrong pơvei 2 teh đak, hơdai hăm hơtŏk hloh dơ̆ng tơdrong hiôk jang hơdai apŭng plĕnh teh vă tơgŭm ăn tơdrong hơtŏk tơiung kơ Việt Nam tơ̆ hơnăp kơnh.

Tơdrong tơm đơ̆ng ‘măng năm ngôi bơ̆jang ‘noh jĭ hơtŏk loi dơ̆ng hơmet ming tơdrong pơvei đơ̆ng Việt Nam - Liên bang Nga, mă loi ‘noh jĭ găh tơdrong pơvei chĭnh trĭ, pơih să hloh dơ̆ng jang hơdai đơ̆ng Việt Nam hăm Liên Bang Nga lơ̆m dôm tơdrong jang mŭk drăm, tĕch mơdro, mă loi ‘noh jĭ găh tơmơ̆t jên jang, ŭnh hơyuh păng đak dâu.... Pơgơ̆r lơ̆m khei ‘năr apŭng plĕnh teh tŏk bŏk yak hloh tơdrong rơhiŭng rơhiăng ŭnh hơyuh tôch kơtang, ‘măng năm ngôi, bơ̆jang đơ̆ng Thủ tướng Phạm Minh Chính gô pơih ăn lơ trong vă jang tih jang hơdai đơ̆ng 2 teh đak. 2 păh tơchĕng hơdrol kĭ dôm Hla ar tơchơ̆t gĭt kăl. Kiơ̆ kơ ‘noh, Liên Bang Nga jĭ teh đak jang hơdai gĭt kăl vei sơđơ̆ng ŭnh hơyuh ăn Việt Nam.