Thủ tướng hlôi năm ngôi tơ̆ 1,2 anih mơdro sa tơ̆ tơring mŭk drăm Nhơn Hội păng pơlung kon pơlei tơ̆ xăh Đề Gi, tơnŏk ka Đề Gi, tơring oei hle An Quan đei ƀơm ưh kơ ‘lơ̆ng yua đơ̆ng ‘mi kial hơbŭt kơsô̆ 13. Năm lăng tơ̆ hơnih mŭk drăm Nhơn Hội, Thủ tướng athei dêh char hơvơn khŭl lĭnh, tơmam, kơmăy kơmŏk tơtĕnh akŏm hơmet ‘lơ̆ng hơnih đei ‘mi kial hơbŭt pơrăm, tơiung ming jang sa, tĕch mơdro, sơđơ̆ng tơdrong jang ăn bơngai jang. Thủ tướng roi tơbăt hlôi athei anih mong jên đei dôm tơdrong asong tŏk iŏk jên, tơ jur jên cheh tơgŭm anih mơdro sa tơ jur ƀiơ̆ hiong răm; anih jang găh jên hu tơchĕng hơlen đei dôm tơdrong jang tơgŭm tơ jur thuê̆, jên nôp; hơdrin pơvei sơđơ̆ng tơdrong hơrih sa kơ bơngai jang. Kơtă năm ngôi, apĭnh jet gia dôm ŭnh hnam kon pơlei đei ƀơm ưh kơ ‘lơ̆ng đơ̆ng đak dơsĭ tŏk, hiong răm tơ̆ xăh Đề Gi, Thủ tướng athei kơdră đảng, khŭl kơdră tơring, rim khŭl lĭnh ƀô̆ đô̆i, kŏng an lơ̆m tơring tơgŭm kon pơlei hyum hơmet râm rĕk, hơmet ming hnam oei, mă loi ‘noh jĭ athei sơđơ̆ng tơdrong jang sa ăn kon pơlei, tơiung pơm tơlĕch tĕch mơdro; tơgŭm kon pơlei găh jên, jên cheh, pơtruh hơdrĕch ‘long pơtăm, yŏng kon tơrong, mă loi ‘noh jĭ rong hơdang. Thủ tướng ‘meh kon pơlei hơtŏk jơhngơ̆m đon hơdrin kơdih, yak hloh pơmat tat, yak tŏk lơ̆m tơdrong hơrih sa.

Ƀlep ƀơ̆t tơbăt 95 sơnăm Năr joăt joe Mặt trận Hơdrĕch hơdrŭng rơngei Việt Nam, dang ei ‘noh Mặt trận Tổ quốc Việt Nam, Thủ tướng Phạm Minh Chính vang truh akŏm Năr Tơgoăt pôm ƀơ̆r đon đĭ đăng hơdrĕch hơdrŭng hăm kon pơlei tơring oei hle Thắng Kiên, xăh Đề Gi, dêh char Gia Lai. Pơma hơdăh pơjing, hơmet ming tơdrong tơgoăt pôm ƀơ̆r đon, pơlung kon pơlei tơgŭm băl yak hloh pơmat tat, Thủ tướng roi tơbăt “Teh đak vang bơngơ̆t, tơring vang bơngơ̆t, kon pơlei vang bơngơ̆t”; vang tơgŭm bơ̆jang, hơmet ‘lơ̆ng dôm tơdrong pơmat tat, long nol, hơtŏk dôm tơdrong pran, vang iŏk yua tơdrong hiôk chơt. ‘Năr dơ̆ng năr âu mơ̆n, Thủ tướng Phạm Minh Chính hlôi năm ngôi, bơ̆jang hăm Ƀô̆ đô̆i vei lăng tơring sơlam dêh char Gia Lai./.