Pơma tơ̆ jơ tơƀâp, Thủ tướng Phạm Minh Chính tơchĕng ‘lơ̆ng Anih tang măt hlôi hơmet rim tơdrong ăn ‘măng năm hơpong đơ̆ng Khul tang măt ăn tĕh đak bơ̆n ‘măng mă âu. Thủ tướng athei Anih tang măt hơlen năng rim tơdrong, tơlĕch jang ‘lơ̆ng, đei yoa dôm tơdrong drơ̆ng nơ̆r hlôi đei kĭ pơkăp ƀlep ƀât ‘măng năm hơpong vă tơgop pơm hơtŏk tơdrong pơvei jang hơdoi tôm tơdrong Việt Nam – Brasil tŏk ‘lơ̆ng hlŏh dơ̆ng tơ̆ hơnăp kơnh. 

Thủ tướng Phạm Minh Chính athei đe kăn ƀô̆, bơngai jang tơ̆ Anih tang măt akŏm jơhngâm ăn tơdrong jang pơm hơtŏk tơdrong jŏh ayŏ kơ dŏ xoang, pơtho pơhrăm, tơplŏng kơdâu păng pơvei đơ̆ng đơ̆ng kon pơlei; jang hơdoi lơ̆m dôm hop akŏm lơ pang vă tơgŭm băl, mă loi jĭ tơgŭm ăn hơnăp jang tơm đơ̆ng ASEAN lơ̆m tơdrong tơ̆ đak dơsĭ Biển Đông.