Pơgê năr 8/11, Gre păr joăt chơ Thủ tướng Tĕh đak Phạm Minh Chính pơm tơm khŭl kơdră kơpal Việt Nam hlôi iung vang năm Hop akŏm Kơdră kơpal ASEAN ‘măng mă 40, 41, rim tơdrong Hop akom kơdră kơpal đei ƀơm trŭh păng iung năm tơmang tĕh đak Campuchia kiơ̆ nơ̆r hơvơn đơ̆ng Thủ tướng Campuchia, Samdech Techo Hun Sen.

‘Nau jing ‘măng năm tơmang Campuchia mă blŭng đơ̆ng Thủ tướng Phạm Minh Chính hăm kơchư̆k jang Thủ tướng, jei jing ‘măng năm tơmang mă blŭng đơ̆ng Kơdră tơm dơnơm kơ Việt Nam trŭh tơ̆ Campuchia lơ̆m Sơnăm Tơgoăt tơgoăl Việt Nam - Campuchia 2022. Tơ̆ rim ‘Măng hop akŏm Kơdră kơpal ASEAN, Thủ tướng Tĕh đak Phạm Minh Chính gô đei nơ̆r pơma gĭt kăl, tơbăt trong jang adoi nhen rim nơ̆r tơlĕch ăn đơ̆ng Việt Nam hơmet pơ ‘lơ̆ng tơgoăt tơgoăl, lăp mĭnh ƀơ̆r đon păng hơnăp jang tơm kơ ASEAN, atŏk kơtang tơgoăt tơgoăl lơ̆m tơring, pơtrŭt kơtang lơ̆m rim tơdrong vang lăng trŭh, atŏk kơtang tơgoăt tơgoăl ƀar păh ASEAN hăm rim tĕh đak jang hơdoi, păng pơma dơnŭh găh rim tơdrong lơ̆m apŭng plĕnh tĕh păng lơ̆m tơring trŏ lăp ‘lơ̆ng hơ iă hlŏh.