Thủ tướng sơkơ̆t hơdah, lơ̆m 48 sơnăm tơ-iung pơjing păng vơ̆ pran, Hŏk viê̆n Kuôk phong hlôi đei iŏk lơ tơdrong jơnei kăp gĭt nhen: jang tơnăp tơdrong tơgŭm gah jang linh, vei lăng teh đak, pơtho khul linh.

Gah sơnong jang dơnơm lơ̆m khei năr truh, Thủ tướng pơtruh nơ̆r hăm Hŏk viê̆n Kuôk phong hơlen kơjăp, băt trŏ tơdrong, tơtom hơdah dôm tơdrong đei ƀôh lơ̆m apŭng plenh teh, lơ̆m tơring vă tơgŭm ăn kơ Đảng, Teh đak gah trong pơm jang tơbôl, vă băt hơdah trong tơlĕch jang mă trŏ ƀlep; Jang tơnăp tơdrong tơgŭm gah trong tơjră kơnê̆; tơdrog akŏm gơh hơgei, hơlen nơ̆r pơma xa, khua hŏk tơdrong jang gah linh, vei lăng teh đak; Hơtŏk tơdrong hơlen hơdrol tơdrong  đei ƀôh vă đei trong jang hơtŏk tơ-iung teh đak, mă lei athei vei sơđơ̆ng tơdrong hiôk hian pơgơ̆r kơdih. Atŭm hăm noh, hơtŏk pran tơdrong hơlen, tơlĕch lơ trong jang mŭk drăm tơpôl tơguăt hăm tơdrong vei sơđơ̆ng tơpôl păng jang tơbôl.