Pơgê năr 11/1, Thủ tướng teh đak bơ̆n Phạm Minh Chính păng Khul Kơpal tang măt ăn Việt Nam hlôi truh Anih tơm Viêng Chăn pơtơm năm tơmang teh đak Cộng hòa Dân chủ Nhân dân Lào  păng atŭm pơgơ̆r tơdrong Hop akŏm mă 45 Anih jang hadoi Khul kơpal teh đak Việt Nam – Lào, kiơ̆ nơ̆r hơvơn đơ̆ng Thủ tướng teh đak Cộng hòa Dân chủ Nhân dân Lào Sonexay Siphandone.

Kiơ̆ tơdrong jang, lơ̆m 'măng năm tơmang Lào, Thủ tướng Phạm Minh Chính pơma đam hăm Thủ tướng Lào Sonexay Siphandone; hmach kơ ƀok Tổng Bí thư, Kơdră teh đak Lào Thongloun Sisoulith; năm akŏm lêh pơtôch Xơnăm Tơguăt tơguăl Tơbôl Việt Nam - Lào, Lào - Việt Nam 2022; pơma đam hăm Kơdră Kuôk hô̆i Lào Saysomphone Phomvihane; năm apong đe kơdră xơ̆ kơ Đảng, Khul kơpal teh đak Lào; atŭm pơgơ̆r 'Măng Hop akŏm mă 45 Anih jang hadoi Khul kơpal teh đak Việt Nam - Lào; năm Hop akŏm jang hadoi axong jang Việt Nam – Lào; tơjrâ̆m kon pơlei Việt Nam tơ̆ Lào. 'Măng năm tơmang teh đak Lào đơ̆ng Thủ tướng Phạm Minh Chính păng Khul Kơpal tang măt ăn Việt Nam tơgop hơtŏk tơdrong tơbôl kăp gĭt, tơguăt tơguăl, jang hadoi tôm tơdrong, lui ngeh đơ̆ng 2 Đảng, 2 teh đak Việt Nam - Lào.