Ƀơ̆t xơng xơnăm 'nao, Têt juăt jue kơ hơdrung hơdrĕch – Puih mak Quý Mão 2023, pơgê năr 18/1 (27 khei 12 âm lĭch), tang măt ăn Kơdră Đảng, Khul Kơpal teh đak, Thủ tướng teh đak bơ̆n Phạm Minh Chính hlôi truh thơ thâu Têt unh hnam, plang hlôt nhang ƀlŏk tơbăt kơ nhap Thủ tướng Phạm Văn Đồng păng Đại tướng Võ Nguyên Giáp tơ̆ hnam kơdih kơ nhap Thủ tướng, hnam kơdih kơ nhap Đại tướng Võ Nguyên Giáp tơ̆ anih tơm Hà Nội.

Tơ̆ hnam kơdih kơ nhap ƀok Thủ tướng Phạm Văn Đồng tơ̆ kơphô̆ Đặng Thái Mai, Hà Nội, Thủ tướng teh đak bơ̆n Phạm Minh Chính plang kơvang pơkao, plang hlôt nhang ƀlŏk tơbăt kơ nhap  Thủ tướng Phạm Văn Đồng – Kơdră kơpal gơh rơgei, lui ngeh, bơngai jang joh ayŏ rơgei hloh kơ teh đak, kơdră jang tơbôl gơh rơgei kơ Đảng, Khul Kơpal teh đak păng kăch mạng Việt Nam, hŏk tro gơh rơgei kơ Ƀok Kơdră Hồ Chí Minh. Thủ tướng teh đak bơ̆n Phạm Minh Chính duh truh plang hlôt nhang ƀlŏk tơbăt kơ Đại tướng Võ Nguyên Giáp păng thơ thâu Têt hăm unh hnam ƀok Đại tướng tơ̆ hnam kơsô̆ 30, trong Hoàng Diệu, Hà Nội.