VOV4.Bahnar - Pơ gê 3/4, tơ̆ Anih jang kơ Khul kơ dră tĕh đak, Thủ tướng Phạm Minh Chính pơ gơ̆r hop akŏm găh tơ drong pơ truh unh điên păng tơ mam ngar, kơ chơ̆t sŏh vă pơm tơ lĕch unh điên.

Pơ ma tơ̆ hop akŏm, Thủ tướng Phạm Minh Chính pơ ma hơ dăh, unh điên jĭ 1 lơ̆m 5 tơ drong kăl tih mă bơ̆n athei vei lăng ‘lơ̆ng vă pơ yoa ăn tơ drong jang tŏk dơ̆ng hrĕnh păng jang atŏk tơ iung mŭk drăm drăm, tơ pôl kơ jăp ‘lơ̆ng. Khei ‘năr âu ki, kŭm hăm tơ drong ‘mĕh vă tŏk kiơ̆ tơ drong jang tŏk mŭk drăm, tơ pôl; đơ̆ng rŏng tơ plih trong arih xa hơ dai sơ đơ̆ng hăm jĭ COVID-19, tơ iung ming dơ̆ng, jang tŏk mŭk drăm, tơ pôl, tơ drong ‘mĕh vă găh unh hơ yuh, mă loi jĭ unh điên tơ̆ tĕh đak bơ̆n roi tŏk. Găh nŏh dơ̆ng, tơ drong pơ truh unh điên, kơ jă unh hơ yuh lơ̆m apŭng plenh tĕh jur tŏk tôch dêh.

Tơ̆ hop akŏm, dôm Phó Thủ tướng, bơ ngai tang măt ăn dôm Anih tơm, anih jang kơ pal pơ ma nuh, tơ lĕch lơ nơ̆r tơ dra; trong jang vă sek tơ lang, hơ met pơ ‘lơ̆ng mơ mat tat; tơ lĕch trong jang hơ doi đơ̆ng dôm anih tơm, anih jang kơ pal vă vei lăng ‘lơ̆ng unh điên pơ yoa ăn tơ drong jang atŏk tơ iung mŭk drăm tơ pôl tơ̆ hơ năp kơnh. Pơ ma pơ tôch hop akŏm, Thủ tướng Phạm Minh Chính kăl tơ lĕch đei trong jang vei lăng sơ đơ̆ng ‘lơ̆ng găh unh điên, unh hơ yuh, tơ drong pơ gơ̆r vei lăng, jang hơ doi, hơ met ming, đei yoa ‘lơ̆ng. Tơ drong tơm ‘nŏh pơm hơ tŏ ‘lơ̆ng ăn unh điên păng unh hơ yuh kơ jăp đunh truh ning mônh.

Dơ̆ng: Tơ blơ̆