VOV4.Bahnar - Pơ gê 13/9, Thủ tướng Phạm Minh Chính pơ gơ̆r hop akŏm mă 17 kơ Anih pơ gơ̆r jang tang găn jĭ covid-19. Hop akŏm đei pơ gơ̆r trư̆k tuyê̆n đơ̆ng Anih jang kơ Khul kơ dră tĕh đak hăm 63 dêh char, pơ lei tơm (plt) găh Trung ương. Pơ ma lơ̆m hop akŏm, Thủ tướng Phạm Minh Chính ăn tơ băt: Truh dang ei, bơ̆n hlôi vei sơ đơ̆ng tơ drong jang mŭk drăm lơ̆m tĕh đak, tang găn kơ jă tơ mam tŏk, jang tơ iung ming mŭk drăm păng jang tŏk pran; tơ drong arih xa kơ kon pơ lei roi tŏk ‘lơ̆ng.

Thủ tướng Phạm Minh Chính pơ gơ̆r hop akŏm găh tang găn jĭ covid-19

Dôm tơ drong iŏk đei ‘nŏh gơ nơm đơ̆ng tơ drong chĕp kơ̆l pơ gơ̆r tôch trŏ, tơ tom đơ̆ng Khul kơ dră chĕp kơ̆l Trung ương Đảng, mă hơ dăh jĭ đơ̆ng Anih Chinh trĭ, Ban Bí thư; tơ drong mât mĭnh ƀơ̆r đon, jang hơ doi kơ jăp đơ̆ng Kuô̆k hô̆i, păng tơ drong vang jang đơ̆ng rim anih jang chinh trĭ… Bơ̆n hlôi jang đei ‘lơ̆ng trong jang ƀet vaccine. Mă lei hrei ‘nâu, oei ƀôh đei đon lăng pơ hơi, ưh kơ chăng hăm tơ drong jĭ. Đon lăng pơ hơi, ưh kơ chăng kơ na tơ drong ƀet vắc xin tam mă lăp hăm nơ̆r pơ tho đơ̆ng Anih pơ gơ̆r jang. ‘Nâu jĭ tơ drong athei tơ blang mă hơ len dơ̆ng. Thủ tướng athei, hơ met pơ ‘lơ̆ng tơ drong ưh kơ măh pơ gang, tơ mam, kơ măy jang pơ gang; vei lăng ‘lơ̆ng khul bơ ngai jang pơ gang; hơ tŏk tơ drong roi tơ băt, pơ hlôh đon găh tơ drong tang găn jĭ ăn kon pơ lei.

Dơ̆ng: Tơ blơ̆