VOV4.Bahnar - Kơ sơ̆ ‘năr 14/7, tơ̆ Anih bơ̆ jang kơ Khŭl kơ dră teh đak, Thủ tướng teh đak Phạm Minh Chính pơ gơ̆r Hop akŏm hơ tŏk tơ iung anih tĕch mơ dro teh, hnam sơ đơ̆ng, ‘lơ̆ng, kơ jăp. Hop akŏm đei pơ gơ̆r kiơ̆ trong trực tuyến đơ̆ng Anih bơ̆ jang kơ Khŭl kơ dră teh đak hăm Anih vei lăng kon pơ lei 5 pơ lei tơm găh Trung ương ‘noh Hà Nội, pơ lei tơm Hồ Chí Minh, Đà Nẵng, Hải Phòng, Cần Thơ. Tơ̆ Hop akŏm, dôm bơ ngai tang măt akŏm pơ ma dơ nuh hơ len lăng păng tơ dra hơ drol anih tĕch mơ dro teh, hnam Việt Nam, tơ lĕch trong vă jang, trong jang găh hơ met ming tơ mam păng hơ nih tĕch vă tĕch mơ dro teh, hnam hơ tŏk tơ iung sơ đơ̆ng, ‘lơ̆ng, kơ jăp.

Thủ tướng Phạm Minh Chính pơ ma tơ̆ hop akŏm

Pơ ma tơ̆ hop akŏm, Thủ tướng Phạm Minh Chính athei dôm anih jang, tơ ring băt hơ dăh tơ drong hơ tŏk tơ iung anih tĕch mơ dro teh, hnam, pơm hơ tŏ tơ drong tĕch mơ dro, pơm tơ drong hiôk ‘lơ̆ng, lơ̆m noh tơ gŭm hơ drol klăih song ‘măn ăn vei lăng sơ đơ̆ng tơ drong arih sa tơ pôl; pơ yom luơ̆t tĕch mơ dro mă lei athei đei hơ năp jang vei lăng teh đak, ưh kơ lê̆ đei tơ drong kơ nê̆.

Thuem: Tơ blơ̆