VOV4.Bahnar - Pơ gê 5/4, tơ̆ Anih jang kơ Khul kơ dră tĕh đak, Thủ tướng Phạm Minh Chính pơ gơ̆r hop akŏm trư̆k tuyê̆n lơ̆m tĕh đak găh tơ drong jang mŭk drăm tơ pôl khei 3 păng 3 khei blŭng sơ năm 2022, tơ lĕch tơ drong jang tơ iung ming dơ̆ng păng jang tŏk mŭk drăm tơ pôl, tơ drong bơ̆ jang păng trong vă jang hơ tŏk hrĕnh tơ drong tơ lĕch jên jang kơ tĕh đak sơ năm 2022, tơ drong jang pơm trong gre gĭt kăl kơ tĕh đak.

Jơ bơ̆ jang lơ̆m hop akŏm trư̆k tuyê̆n

Pơ ma lơ̆m hop akŏm, Thủ tướng Phạm Minh Chính pơ ma hơ dăh, ‘năr 5/1, Khul kơ dră tĕh đak pơ gơ̆r hop akŏm trư̆k tuyê̆n hăm dôm tơ ring găh tơ drong jang atŏk tơ iung mŭk drăm, tơ pôl sơ năm 2022, truh dang ei, tơ̆l 3 khei đơ̆ng rŏng hop akŏm âu, athei hơ len năng trong tơ lĕch dôm tơ drong jang lơ̆m sơ năm 2022, đon kơ chăng, vang bơ̆ jang đơ̆ng kon pơ lei, khul tĕch mơ dro hăm tơ drong pơ gơ̆r đơ̆ng Khul kơ dră tơ ring.

Jơ bơ̆ jang lơ̆m hop akŏm trư̆k tuyê̆n

Thủ tướng athei, dôm anih jang tơ̆ Trung ương đei trong jang tơ tom, găn tôch ai tơ drong ƀơm ưh ‘lơ̆ng, hăm đon pơ hnŏng mă hơ tuch ‘nŏh vei sơ đơ̆ng muk drăm lơ̆m tĕh đak, pơ jing tơ drong jang mŭk drăm kơ dih kơ jăp ‘lơ̆ng. Thủ tướng athei dôm bơ ngai tang măt akŏm đon rơ gei, hơ len năng dơ̆ng dôm tơ drong kăl đei bơ̆ jang âu ki, chih iŏk ƀai hŏk kăl, tơ lĕch trong jang đơ̆ng dang ei truh hơ tuch sơ năm vă bơ̆ jang dôm tơ drong tơ chơ̆t đơ̆ng Kuô̆k hô̆i, Khul kơ dră tĕh đak, chih hơ dăh dôm nơ̆r pơ tho đơ̆ng Hop akŏm Trung ương 4 khei 10/2021.

Dơ̆ng: Tơ blơ̆