VOV4.Bahnar - Pơ gê ‘năr 15/9, Thủ tướng Phạm Minh Chính pơ gơ̆r Hop akŏm Tŭn pran hơ met ming hla ar hành chính păng trong jang chĕp kơ̆l pơ gơ̆r pơ vih pơ văn ăn kon pơ lei, anih jang mơ dro sa. Hop akŏm đei tơ goăt trực tuyến truh 63 dêh char pơ lei tơm lơ̆m teh đak. Pơ ma tơ̆ hop akŏm, Thủ tướng Phạm Minh Chính tơ ƀôh hơ dăh, hơ met ming hành chính ling lang đei Đảng, teh đak băt hơ dăh ‘noh tơ drong gĭt kăl vă pơ jing, jang keh đang ‘lơ̆ng teh đak chĕp kơ̆l pơ gơ̆r kiơ̆ xã hội chủ nghĩa rơ goh, pran kơ jăp, đei yua, jơ nei, yua kơ kon pơ lei pơ vih pơ văn, yua kơ tơ drong hơ tŏk tơ iung kơ teh đak.

Thủ tướng Phạm Minh Chính pơ gơ̆r hop akŏm tŭn pran hơ met ming hla ar hành chính

Thủ tướng pơ ma hơ dăh, gơ nang đơ̆ng tơ drong hơ drin đơ̆ng pơ đĭ khŭl jang chĭnh trĭ păng đĭ đăng kon pơ lei, bơ̆n đei dôm hơ yak năm gĭt kăl lơ̆m hơ met ming hành chính, mă loi ‘noh jĭ hơ met ming hla ar hành chính; tơ iung păng hơ vơn rim bơ ngai jang, jên jang ăn hơ tŏk tơ iung teh đak; hơ tŏk ‘lơ̆ng đei yua, jơ nei lơ̆m tơ drong jang chĕp kơ̆l pơ gơ̆r đơ̆ng khŭl kơ dră rim tơ ring. Mă lei, hơ dai hăm dôm jơ nei iŏk đei, oei đei dôm tơ drong ưh kơ ‘lơ̆ng kăl kơ jăh hơ met ming vă tơ tĕnh pơm hiôk, hơ vơn păng iŏk yua jơ nei rim kon jên jang ăn tơ iung ming, hơ tŏk tơ iung teh đak lơ̆m khei ‘năr hrei ‘nâu.

Thuem: Tơ blơ̆