VOV4.Bahnar - Gơ măng 15/02, Thủ tướng Phạm Minh Chính pơ ma đam hăm điên thoăi hăm ƀok Albert Bourla, Kơ dră chĕp kơ̆l pơm hloi Kơ dră pơ gơ̆r Grŭp jang Pfizer. Tơ̆ jơ pơ ma đam, Thủ tướng Phạm Minh Chính bơ nê, tơ chĕng ‘lơ̆ng Grŭp jang Pfizer păng kơ dih kâu ƀok Kơ dră Pfizer khei ‘năr âu ki jang hơ doi tôch đei yoa hăm dôm anih jang kơ Việt Nam vă pơ truh tôm, hrôih 51 triu kơ liêu vắc-xin tang găn jĭ COVID-19 ăn Việt Nam kiơ̆ nơ̆r athei đơ̆ng Việt Nam lơ̆m tơ drong pơ ma đam hăm Thủ tướng ‘năr 20/08/2021.

Thủ tướng Phạm Minh Chính

Thủ tướng Phạm Minh Chính ăn tơ băt, brei drou Việt Nam hlôi răt iŏk vắc xin đơ̆ng Pfizer ƀet ăn hơ iŏh đơ̆ng 12-17 sơ năm, truh dang ei, jrŭm 1 ƀet đei vă jê̆ 96%, jrŭm 2 đei vă jê̆ 90% păng ‘nâu jĭ tơ drong adrin tôch tih. Tơ drong ‘nâu tơ gŭm ăn hơ iŏh sơ đơ̆ng jơ hngâm ƀiơ̆ mưh năm hŏk dơ̆ng. Tơ̆ hơ năp tơ drong jĭ oei tôch kơ krê, vă vei lăng jơ hngâm pran ăn hơ iŏh păng hơ nơ̆ng bơ̆ jang ‘lơ̆ng tơ drong pơih dơ̆ng ‘măng hnam trưng sơ đơ̆ng ‘lơ̆ng, Thủ tướng athei Kơ dră chĕp kơ̆l pơ gơ̆r Grŭp jang Pfizer tơ rĕk roi hrôih roi ‘lơ̆ng, jăh pơ truh 22 triu kơ liêu vắc-xin ‘măn ăn hơ iŏh đơ̆ng 5 truh hơ la kơ 12 sơ năm tơ̆ Việt Nam lơ̆m dôm năr truh hloi.

Dơ̆ng: Tơ blơ̆