VOV4.Bahnar - Kơ sơ̆ ‘năr 1/3, Thủ tướng Teh đak Phạm Minh Chính hlôi pơ ma điên thoăi hăm ƀok Kasper Rorsted, Kơ dră dơ nơm Grŭp jang Adidas vă pơ ma dơ nuh găh dôm trong jang pơ trŭt tơ drong jang pơm tơ lĕch, tĕch mơ dro đơ̆ng adidas tơ̆ Việt Nam. Tơ̆ ‘măng pơ ma điên thoăi, Thủ tướng tơ ƀôh jơ hngơ̆m đon lui ngeh Grŭp jang adidas gô iŏk đei dôm jơ nei tih tên hloh dơ̆ng păng hơ nơ̆ng tŭn pran tơ drong jang pơm tơ lĕch tĕch mơ dro tơ̆ Việt Nam, đei hloi tơ drong pơm tơ drong hiôk ăn rim anih jang mơ dro sa Việt Nam vang jang jrŭ hloh dơ̆ng lơ̆m tơ drong tĕch mơ dro jơ̆p plei teh đơ̆ng adidas.

Thủ tướng Phạm Minh Chính

Thủ tướng athei Grŭp jang hơ nơ̆ng hơ tŏk ‘lơ̆ng hơ năp jang tơ pôl đơ̆ng anih jang mơ dro sa, bơ ngơ̆t truh vei sơ đơ̆ng đei yua păng tơ drong hiôk bơ̆ jang ‘lơ̆ng ăn bơ ngai jang Việt Nam. Thủ tướng tơ roi tơ drong tơ gŭm hơ drol đơ̆ng Khŭl kơ dră teh đak Việt Nam găh jang tŏk rơ goh, tơ jur tơ lĕch ‘mê̆ ‘mach păng lăng ‘lơ̆ng nơ̆r pơ kăp đơ̆ng Adidas găh pơm tơ lĕch tĕch mơ dro kơ jăp tơ klep hăm vei lăng cham char, iŏk yua ŭnh hơ yuh 1 trong đei yua ‘lơ̆ng. Thủ tướng tơ ƀôh đon ‘meh vă adidas gô hơ nơ̆ng tơ gop pơ trŭt tơ drong pơ vei jang hơ dai mŭk drăm - mơ dro sa - tơ mơ̆t jên jang đơ̆ng Việt Nam hăm Cộng hòa Liên bang Đức păng hăm Jơ nŭm Châu Âu.

Thuem: Tơ blơ̆