VOV4.Bahnar - ‘Năr 18/10, Thủ tướng Phạm Minh Chính pơ ma điên thoăi hăm Thủ tướng Australia Anthony Albanese găh dôm trong jang pơm hơ tŏk tơ drong pơ vei đơ̆ng 2 tĕh đak, mă loi hơ tŏk tơ drong jang hơ doi mŭk drăm-tĕch mơ dro-tơ mât jên jang, năm truh ‘măng tơ băt 50 sơ năm pơ jing tơ drong pơ vei jang tơ bôl kơ 2 tĕh đak sơ năm 2023.

Thủ tướng Phạm Minh Chính pơ ma điên thoăi hăm Thủ tướng Australia

Thủ tướng Phạm Minh Chính păng Thủ tướng Anthony Albanese chă pơ đou dơ̆ng dôm hơ yak tŏk pran ‘lơ̆ng păng đei yoa lơ̆m tơ drong pơ vei đơ̆ng 2 tĕh đak khei ‘năr âu ki. 2 Thủ tướng tơ chĕng ‘lơ̆ng tơ drong 2 tĕh đak vei kơ jăp tơ drong pơ gơ̆r ăn khul grŭp tơ ƀâp băl, pơ gơ̆r tơ ƀâp tih, lơ̆m nŏh đei tơ drong hơ met ăn ‘măng năm hơ pong ngôi tơ̆ Australia truh âu kơnh đơ̆ng Kơ dră Kuô̆k hô̆i Vương Đình Huệ.

Thủ tướng Phạm Minh Chính athei găh Australia hơ nơ̆ng tơ gŭm ki thuơ̆t păng pơih xă ‘măng anih tĕch mơ dro ăn pơ kao, plei ‘long păng ka hơ dang đơ̆ng Việt Nam. Thủ tướng Phạm Minh Chính oei athei Australia pơ lung anih tĕch mơ dro Australia hơ tŏk tơ drong tơ mât jên jang lơ hlŏh dơ̆ng tơ̆ Việt Nam.

VOV/Dơ̆ng tơ blơ̆