VOV4.Bahnar - Kơ sơ̆ ‘năr 21/6 tơ̆ Anih jang kơ Khul kơ dră tĕh đak, Thủ tướng Phạm Minh Chính hlôi pơ ma nuh hăm Kơ dră Kuô̆k hô̆i Mozambique Esperança Bias oei hơ pong tơ̆ Việt Nam. Thủ tướng Phạm Minh Chính hơ iă hăm Mozambique ‘măng mă blŭng đei pôk pơm Tĕh đak jang pơ lơ̆h lơ̆m Jơ nŭm vei lăng sơ đơ̆ng Liên hợp quốc jăl jang 2023-2024 hăm kơ phĭu tôch lơ păng lui Mozambique gô jang đang ‘lơ̆ng hơ năp jang ‘nâu, tơ gop ‘lơ̆ng ăn tơ drong rơ ngei, sơ đơ̆ng, jang hơ doi păng jang tŏk tơ̆ tơ ring păng lơ̆m apŭng plenh tĕh.

Thủ tướng pơ ma hơ dăh tơ drong ‘lơ̆ng vă jang hơ doi đơ̆ng Việt Nam păng Mozambique oei tôch lơ, Việt Nam ‘mĕh roi tơ băt trong jang tŏk păng jang tơ bôl, mât jang hơ doi hăm Mozambique; tơ lĕch lơ trong jang vă pơm pơ ‘lơ̆ng hlŏh dơ̆ng tơ drong pơ vei 2 pang păng hơ pơi ‘mĕh Kuô̆k hô̆i 2 tĕh đak hơ nơ̆ng tơ gŭm, pơ jing tơ drong ‘lơ̆ng mưh tơ lĕch jang. Kơ dră Kuô̆k hô̆i Mozambique pơ ma hơ dăh Mozambique năng Việt Nam jĭ 1 lơ̆m dôm tĕh đak jang hơ doi git kăl hlŏh tơ̆ châu Á; pơ kăp vă tưk tơ iung hơ năp jang đơ̆ng anih chih pơ jing luơ̆t tơ gŭm păng pơ jing tơ drong ‘lơ̆ng vă hơ tŏk tơ drong jang hơ doi đơ̆ng 2 tĕh đak.

Dơ̆ng: Tơ blơ̆