Pơma tơ̆ hop akŏm, Thủ tướng Phạm Minh Chính pơma hơdăh, jăl khei mă 1/2023 tơdrong jang tŏk mŭk drăm tơ̆ tĕh đak bơ̆n tŏ sĕt ƀiơ̆ kơ khei âu sơnăm 2022 yoa đơ̆ng dôm tơdrong đơ̆ng ‘ngoăih păng đơ̆ng kơdih bơ̆n hai. Vă jang tŏk ming mŭk drăm hrĕnh păng jang tŏk pran kơjăp athei hơlen năng, tơlĕch dôm tơdrong hơgăt, tơdrong vă jang, trong jang mă lăp; lơ̆m nŏh hơnơ̆ng tơgŭm ăn anih tĕch mơdro, kon pơlei, tưk tơiung tơdrong jang xa, tĕch mơdro.

Thủ tướng pơma hơdăh, blŭng a ‘nŏh athei iŏk yoa ‘lơ̆ng dôm tơmam đơ̆ng tĕh đak, đơ̆ng Anih mong jên vă hơnơ̆ng tưk tơiung jơhngâm pran atŭm kơ tĕh đak, akŏm jên, tơmam vă jang tŏk, mă loi ‘nŏh vă hơmet pơ ‘lơ̆ng dôm tơdrong pơmat tat kơ plăh dang ei, lơ̆m nŏh đei trong jang vă mong akŏm kon jên, tơmam drăm ăn dôm tơdrong jang ƀơm truh tơ̆ tĕh, hnam, tŏk iŏk jên, sơng iŏk jên đơ̆ng anih tĕch mơdro, đơ̆ng kon pơlei, anih tĕch trái phiếu.... đơ̆ng nŏh tơlĕch đei dôm tơdrong tơgŭm mă tơtom. Atŭm hăm ‘nŏh hơnơ̆ng chă ƀôh dôm tơdrong tơhlăk tăk kăl đei hơmet ming; drơ̆ng nơ̆r hăm đon tơchĕng, trong jang vă tơlĕch đei dôm trong jang lăp ‘lơ̆ng.