Gơmăng hei (7/10), tơ̆ Anih jang kơ Khul kơdră teh đak, Thủ tướng Phạm Minh Chính pơgơ̆r Hop akŏm mă 16 Anih pơgơ̆r jang kơ teh đak găh tang găn rôp yâu ka hơdang glăi khôi luơ̆t, ưh đei roi tơbăt păng ưh đei pơm kiơ̆ tơdrong hơgăt (IUU). Hop akŏm đei pơih trư̆k tuyê̆n truh tơ̆ 21 dêh char, plt tơter đak dơsĭ. Thủ tướng Phạm Minh Chính tơchĕng ‘lơ̆ng đon jang tơnăp đơ̆ng dôm anih tơm, anih jang kơpal, tơring tơrang adrin hơmet pơ ‘lơ̆ng, vă pleh hŭt lê̆ the jơk IUU.

Đơ̆ng giĕng adrol ki truh dang ei, hơlen năng rim kơsô̆ ƀato tam mă đei hla ar asong jang jur ƀiơ̆; ƀato yâu ka ưh đei tôm tơdrong kăl vă năm jang xa kŭm jur; ƀato đei chô̆ hơmet kơmăy hơlen năng trong yak, vei lăng kiơ̆ video rơgei roi tŏk; tam mă chă ƀôh dơ̆ng ƀato yơ ưh đei kơmăy vei lăng, jang xa klĕch tơ̆ tơring đak dơsĭ đe; tam mă đei ƀato yơ pơm glăi tơ̆ tơring đak dơsĭ teh đak nai đei rôp vei… Pơma truh tơdrong athei bơ̆ jang mă tơnăp, khŏm tang găn tơdrong rôp yâu ka glăi hăm tơdrong hơgăt IUU, dôm tơdrong hơlĕnh pơdăr, klĕnh thuê̆…; Thủ tướng akhan tơdăh kăl đei trong sek phak, Anih tơm vei lăng choh jang xa păng cham char kŭm hăm dôm tơring athei tơlĕch nơ̆r, apinh hăm Khul kơdră teh đak vă sek tơlang kĕh tơdrong ‘nâu.