Tơ̆ jơ hop akŏm, Thủ tướng athei akŏm khul jang vă tơgŭm dŏng kon bơngai, vei lăng bơngai rơka, băt hơdah tơdrong đei ƀôh, tơring ƀơm tơklah hơdrô̆ vă chă tơgŭm ăn kon pơlei. Thủ tướng akhan dah hơlen lăng tơdrong đei ƀôh tơ̆ tơring, vă chă rim trong jang, hơvơn rim khul jang năm truh tơ̆ tơring kăl tơgŭm dŏng. Thủ tướng pơgơ̆r hăm Anih tơm jang gah Jên hu dah asong phe ăn dôm dêh char; tơ̆ hơnăp noh tơgŭm dêh char Lâm Đồng 200 tih hlj, dêh char Khánh Hòa 200 tih hlj; dêh char Đăk Lăk păng Gia Lai rim dêh char 150 tih hlj dah asong hloi ăn dôm tơring.

Thủ tướng pơjao lơ̆m pơgê ou năr 21/11, Phŏ Thủ tướng Lê Thành Long dah năm truh dêh char Gia Lai, Phŏ Thủ tướng Hồ Đức Phớc dah năm truh dêh char Đăk Lăk, Phŏ Thủ tướng Hồ Quốc Dũng năm truh Lâm Đồng vă pơgơ̆r tơdrong jang tang găn păng hơmet ming răm đơ̆ng 'mi kial đak hơbông pơm đei; kăp gĭt hơdrol noh dŏng tơgŭm kon bơngai.