Thủ tướng hôn bơnê dôm tơdrong hơdrin đơ̆ng rim hơnih tơm, hơnih jang, tơring, tơpôl hơnih mơdro sa, kon pơlei, sơkơ̆t hơdăh dôm tơdrong iŏk đei jơnei hlôi tơgop gĭt kăl lơ̆m tŏk mŭk drăm-tơpôl, pơm hơtŏk kĕ jang chĕp pơgơ̆r teh đak păng bơ̆ jang ‘lơ̆ng pơvih pơvăn ăn kon pơlei. Thủ tướng pơma hơdăh athei tơplih kơtang jơhngơ̆m đon tơchĕng tơlĕch jang kiơ̆ tơdrong jang jing vei lăng kiơ̆ iŏk đei jơnei, iŏk tơdrong bơ̆ jang jơnei păng tơdrong lăp đon đơ̆ng kon pơlei hăm hơnih mơdro sa pơm ‘long pơtŏ jang ‘lơ̆ng. mă kăl ‘noh pơm pơkeh rim tơdrong tơchơ̆t, trong bơ̆ jang kơtang, mă kăl lơ̆m atŏk tơ iung mŭk drăm yưh lĭu hăm kmăi kmŏk hơgei. Thủ tướng athei rim hơnih tơm tĕnh koăng tơ iung pơjing păng tơlĕch hla bơar pơtho tơbăt rim Khôi luơ̆t Tơplih kơsô̆, kmăi kmŏk hơgei, sơđơ̆ng mạng, Mơdro sa điên tư sơđơ̆ng khei ‘năr tơlĕch jang kiơ̆ păng jang kiơ̆ ‘lơ̆ng lei lăi hăm khôi luơ̆t, veh ver ưh gan lăp tơdrong pơkăp. Hơnih tơm Kŏng ang chă tơchĕng hơlen, tơ iung pơjing pơtruh ăn Khul kơdră chĕp pơgơ̆r tơchơ̆t ăn: Tơdrong tơchơ̆t găh trong jang atŏk tơ iung kơ Hơnih tơm Tơchăr, tơlĕch jang yưh lĭu găh Hơnih tơm Yưh lĭu teh đak, jang keh đang lơ̆m Jăl I/2026.