VOV4.Bahnar - Pơgê năr 24/8, tơ̆ Hơnĭh bơ̆ jang Khŭl Kơdră chĕp pơgơ̆r Tĕh đak, Thủ tướng Phạm Minh Chính pơm tơm Hop akŏm Khŭl kơdră tĕh đak găh tơ iung pơjing Khôi kuơ̆t khei 8/2022 vă lăng hơlen 4 tơdrong vă pơjing khôi luơ̆t gĭt kăl hơdrol pơtrŭh ăn, tơgŭm ăn ‘Măng hop akŏm mă 4 Kuô̆k hô̆i jăl XV ‘nŏh; Tơdrong vă pơjing Khôi luơ̆t Groi tĕh (hơmet ming) kơ yuơ Dơnŏ anĭh tơm vei lăng Mŭk drăm Bri brăh păng Cham char hơmet ăn; tơdrong vă pơjing Khôi luơ̆t Rơ̆ih bơngai iŏk ming man (hơmet ăn) kơ yuơ Dơnŏ anĭh tơm Pơ prŏ Tơdrong jang păng Tơmơ̆t jên jang hơmet ăn; tơdrong vă pơjing Khôi luơ̆t Kơ jă (hơmet ming) kơ yuơ Dơnŏ anĭh tơm vei lăng bơ̆ jang jên hu hơmet ăn.

Thủ tướng Phạm Minh Chính pơm tơm Hop akŏm

Iung pơma tơ̆ hop akŏm, Thủ tướng Phạm Minh Chính pơma hơdăh, tơdrong pơjing khôi luơ̆t tôch gĭt kăl, hơnơ̆ng, kơ yuơ lơ lŏh athei rim kơdră jang lơ̆m Khŭl kơdră chĕp pơgơ̆r Tĕh đak, Kơdră chĕp pơgơ̆r rim hơnĭh bơ̆ jang kăl jang kiơ̆ kơ jăp, kơrŭn đĭ jơhngơ̆m đon pơma dơnŭh mă hơlen. Thủ tướng ‘mĕh vă rim kơdră tang măt akŏm pơma dơnŭh rim tơdrong oei đei nơ̆r tơgop phara dĭh băl, rim tơdrong hle, rim tơdrong oei tơhlăk tơhlĭn lơ̆m yan au.

Tơblơ̆ nơ̆r: Amazưt