VOV4.Bahnar - Pơgê năr 2/3, tơ̆ Hơnĭh bơ̆ jang Khŭl kơdră Tĕh đak, Thủ tướng Phạm Minh Chính pơm tơm Hop akŏm trư̆k tuyên Lơ̆m tĕh đak găh atŏk kơtang pơjing trong pơ prŏ jang păng apinh jet trong Pơ prŏ jang tĕh đak jăl jang 2021 - 2030, lăng trŭh sơnăm 2050.

Iung pơma pơgơ̆r blŭng a, Thủ tướng Phạm Minh Chính pơma hơdăh, đơ̆ng rŏng vă jê̆ 1 sơnăm tơlĕch jang pơ đĭ lơ̆m Khŭl Kơdră ‘nao chep pơgơ̆r Tĕh đak, ‘nau jing ‘măng mă ƀar pơgơ̆r hop akŏm găh pơtrŭt kơtang, lăng hơlen rim trong pơ prŏ jang kiơ̆ Khôi luơ̆t Pơ prŏ jang đei tơlĕch ăn. Jô̆ đơ̆ng ‘măng hop akŏm hơdrol trŭh dang ei, Khŭl Kơdră tĕh đak hlôi jang đang mĭnh ƀar tơdrong, mă lei, tơdrong iung jang, lăng hơlen păng ki tơchơt trong pơ prŏ jang oei hiơ hiơ̆ pơtêng hăm ‘meh vă. Kiơ̆ tơbăt, trŭh dang ei ‘nao pơjing đei vă jê̆ 10% trong pơ prŏ jang kăl pơjing lơ̆m trong bơ̆ jang pơ đĭ lơ̆m tĕh đak. Thủ tướng athei akŏm lăng hơlen, pơma dơnŭh, iŏk nơ̆r tơgop găh Trong pơ prŏ jang tĕh đak jăl jang 2021-2030, lăng trŭh sơnăm 2050. Hơnơ̆ng dăr lăng, lăng hơlen dôm tơdrong tơhlăk tơhlĭn, dôm tơdrong jang tim mă keh đang, dôm tơdrong pơm ăn ƀơm trŭh tơdrong tơchơ̆t dăh mă ư̆h vă Khŭl kơdră tĕh đak hơnơ̆ng ming hơmet, tơmơ̆t ming dơ̆ng.

Tơblơ̆ nơ̆r: Amazưt