Ƀok Kơdră tơm Vladimir Putin sơkơ̆t hơdặ, ‘măng năm tơmang đơ̆ng Thủ tướng Phạm Minh Chính jĭ tôch gĭt kăl lơ̆m tơdrong hơnơ̆ng vei kơjăp păng pơtrŭt kơtang jang hơdoi dih băl. Lơ̆m jơ ‘năr hơ iă, ƀar ‘nu kơdră hlôi tơroi tơbăt dih băl găh tơdrong păng trong vă iung jang, trong jang atŏk tơ iung mŭk drăm-tơpôl kơ teh đak kơdih. Khei năr ou ki, hăm tơdrong hơdrin đơ̆ng Khul kơdră chĕp pơgơ̆r ƀar teh đak, rim hơnih tơm, hơnih jang, tơring đei ƀơm truh, tơgoăt tơgoăl jang hơdoi lơ tơdrong ƀar păh Việt Nam - Liên bang Nga tŏk bok atŏk tơ iung tôch kơ ‘lơ̆ng hơ iă. ‘Moi kiơ̆ tơdrong ou, Thủ tướng Phạm Minh Chính hăm Ƀok kơdră tơm Vladimir Putin hlôi pơma dơnuh dih băl kơtang găh tơdrong ‘meh vă, tơdrong đei đơ̆ng kơdih teh đak, xơkơ̆t hơdăh dôm tơdrong kăl, trong pơchoh ăn tih tên lơ̆m jang hơdoi dih băl khei năr kơnh, vă pơm kơtang hloh dơ̆ng tơgoăt tơgoăl jang hơdoi tôm tong Việt Nam - Liên bang Nga, lăng ‘nou jĭ tơdrong kăl hloh ăn tơdrong jang đunh đai tai sơnăm kơ ƀar teh đak.