Kơsơ̆ ‘năr 13/12, lăp đơ̆ng rŏng kơ Lêh sơng tơ̆ Hnam ƀok pơtao Egmont, 2 Thủ tướng hlôi pơgơ̆r pơma đam. Tơ̆ pơma đam, 2 kơdră chĕp kơ̆l hlôi drơ̆ng nơ̆r dôm trong jang tih vă tŭn pran tôm tơdrong jang hơdai đơ̆ng 2 teh đak, mă loi ‘noh jĭ pơm ‘lơ̆ng jang hơdai lơ̆m tơdrong jang choh jang sa, tŭn pran jang hơdai tơmơ̆t jên jang, mơdro sa păng lơ̆m dôm tơdrong jang nai hai. 2 păh drơ̆ng nơ̆r pơih să jang hơdai đơ̆ng 2 teh đak lơ̆m dôm tơdrong jang khŭl linh - vei sơ đơ̆ng, pơtho pơhrăm, joh ayŏ, mă loi ‘noh jĭ pơgơ̆r  Năr joh ayŏ tơ̆ 2 teh đak vă hơtŏk tơdrong hlôh băt, tơƀơ̆p băl đơ̆ng kon pơlei, tơmang lăng păng tŭn pran jang hơdai vang hơmet pơ ‘lơ̆ng dôm long nol jơ̆p plei teh.

Thủ tướng teh đak Phạm Minh Chính athei Khŭl kơdră teh đak Bỉ hơnơ̆ng bơngơ̆t truh, pơm tơdrong hiôk ăn tơpôl bơngai Việt Nam tơ̆ Bỉ mơ̆t jang hơdai jơ nei păng tơgop ăn hơtŏk tơiung mŭk drăm - tơpôl Bỉ, lăng ‘nâu jĭ gơng tơƀưh pơtrŭt tơdrong pơvei jang hơdai đơ̆ng 2 teh đak.