Kơ sơ̆ ‘năr 13/11, lăp đơ̆ng đơ̆ng pơm lêh sơng, Thủ tướng Phạm Minh Chính hlôi pơma đam hăm Thủ tướng CHLB Đức Olaf Scholz. Tơ̆ jơ pơma đam, Thủ tướng Phạm Minh Chính lăng ‘măng năm ngôi, bơ̆ jang đơ̆ng Thủ tướng Olaf Scholz đei tơdrong ‘lơ̆ng gĭt kăl, hơnhăk tơdrong pơvei 2 teh đak jing jăl jang hơtŏk tơiung ‘nao. Lơ̆m tơdrong lui ngeh păng tơpăt, 2 Thủ tướng hlôi pơma dơnuh tôm tong găh tơdrong hơtŏk tơiung mŭk drăm -tơpôl 2 teh đak, tơdrong pơvei jang hơdai 2 pang păng dôm tơdrong tơring, apŭng plĕnh teh vang bơngơ̆t truh.

Ƀar Thủ tướng hlôi drơ̆ng nơ̆r dôm trong jang tih vă tŭn pran tôm tơdrong jang hơdai đơ̆ng 2 teh đak. 2 păh hlôi drơ̆ng 1 nơ̆r hơtŏk loi dơ̆ng pơma dơnuh khŭl rim kơdră, mă loi ‘noh kơdră kơpal, kiơ̆ lơ̆m đĭ đăng kênh Đảng, Teh đak, Khŭl kơdră teh đak, Kuôk hô̆i, hơnơ̆ng tơlĕch jang đei yua dôm trong jang hơdai 2 pang. Găh mŭk drăm - mơdro sa, 2 Kơdră chĕp kơ̆l pơtrŭt rim anih jang, anih mơdro sa 2 teh đak hơnơ̆ng tơlĕch jang tôm, đei yua tơdrong tơchơ̆t Mơdro sa hiôk hian Việt Nam - EU (EVFTA).