Ƀar păh pơma dơnuh, drơ̆ng minh nơ̆r lơ trong hơmet pơ ‘lơ̆ng tơnap tap, pơtrut kơtang jang hơdoi tôm tong, lăng truh pơm hơtŏ trŏ lăp hăm tơgoăt tơgoăl Việt Nam - Nga kiơ̆ trong tơpă, jơnei, kơjăp, kơ yuơ đei iŏk yoa ăn kon pơlei ƀar teh đak păng rơngei hiôk hian, sơđơ̆ng tơring, apŭng plĕnh teh. Ƀar Thủ tướng sơkơ̆t hơdăh hơdrin kơtang ba jang hơdoi mŭk drăm, mơdro sa, tơmơ̆t jên jang jing trong tơm dơnơm, tơlĕch jang kiơ̆ jơnei Tơdrong tơchơ̆t mơdro sa hiôk hian ƀar păh Việt Nam păng Jơnŭm atum Mŭk drăm Á - Âu, pơih să hơnih tĕch răt tơmam drăm, pơtrŭt kơtang tơmơ̆t jên jang dih băl. Ƀar păh jei drơ̆ng minh nơ̆r chă tơchĕng hơlen pơih să jang hơdoi lơ̆m rim tơdrong ŭnh hơyuh ‘nao, ŭnh hơyuh rơgoh ‘lơ̆ng. Mă kăl, ƀar ‘nu kơdră chĕp pơgơ̆r hôn bơnê kơtang tơdrong kĭ pơkăp Tơdrong tơchơ̆t jang hơdoi tơ iung pơjing Hnam kmăi ŭnh hơyuh hạt nhân tơ̆ Việt Nam, pơih trong jang hơdoi kăl ‘nao kơ ƀar teh đak.